О́ńirdiń injý-marjany sanalatyn, kórkemdigi kóz toıdyratyn Soltústik Qazaqstandaǵy Shalqar-Imantaý aımaǵy aldaǵy 6 jylda adam tanymastaı ózgeredi.
«Imantaý kóliniń jıeginde jaǵalaý jasaımyz. Atpen serýendeýge arnalǵan jáne velosıped joldary tóseledi. Sondaı aq, ádemi sholý alańy men týrısterge aqparattyq kómek kórsetetin vızıt-ortalyq salynady», dedi ákimdiktiń keńeıtilgen otyrysynda esep bergen kásipkerlik jáne týrızm basqarmasynyń basshysy Quralaı Jarova.
Osynaý aýmaqty jobalardy júzege asyrý úshin 2019-2025 jyldar aralyǵynda respýblıkalyq jáne jergilikti qazynalardan 23 mlrd teńge jumsalatyn bolady.
Aımaq basshysy birinshi kezekte jol máselesin sheshýdi tapsyrdy.
«Qalpyna keltiriletin joldardyń sapasyn qoǵamdyq uıymdar men partııa ókilderi de júıeli baqylaýǵa alýlary kerek. Áıtpese, sharýany júrdim-bardym atqaratyn merdigerler joq emes», dedi Qumar Irgebaıuly.
Kýrorttyq aımaqqa qatysty ózge de problemalar jeterlik. Solardyń biri – talapqa saı ınfraqurylymnyń joqtyǵy. 40-qa jýyq demalys bazasynyń tek 26-synda ǵana elektr qýaty, 13-inde ǵana ortalyqtandyrylǵan sý qubyrlary bar. Mobıldik baılanys, sıfrlyq televızııa júıesin jaqsartý-basty talaptardyń biri. Qoqys polıgonyn salýǵa qarjy qarastyrylmaǵan. Bir sózben aıtqanda, eski-qusqy demalys oryndary kórkem tabıǵattyń kórinisin buzyp tur.
«Keı pysyqaılar demalys nysandaryn «taýyq qoraǵa» uqsatyp salyp qoıyp, jalǵa berýmen ǵana shektelip otyr. Olardy “demalys bazasy” dep aıtýdyń ózi uıat. Tártip, tazalyq joq, sanıtarlyq talaptar múldem saqtalmaıdy. Qaýipsizdik jaıy umyt qalǵan», degen aımaq basshysy ózge de mindetterdi belgilep berdi.
Shalqar-Imantaý – týrıster arasynda asa tanymal. Bıyl 63 myń adam tynyqqan. 10 myńnan astamy – sheteldikter. Bul kórsetkish ótken jylǵa qaraǵanda 40 prosentke kóp.
Soltústik Qazaqstan oblysy