Tıisti sheshim Nur-Sultanda ótken salalyq biliktilik sheńberleri men kásibı standarttardy ázirleý boıynsha Biliktilik jónindegi ulttyq keńestiń otyrysy barysynda qabyldandy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Is-sharaǵa QR Premer-mınıstriniń orynbasary Berdibek Saparbaev, QR Eńbek jáne halyqty áleýmettik qorǵaý mınıstri Birjan Nurymbetov, «Eńbek resýrstaryn damytý ortalyǵy» AQ prezıdenti Tamara Dúısenova, Ulttyq keńeske múshe birqatar mınıstrlikterdiń vıse-mınıstrleri, «Atameken» UKP ókilderi, qoǵamdyq birlestikter men kompanııalar qatysty.
Jıynda sóz alǵan BTS Digital bilim berý ortalyǵynyń basshysy Saıasat Nurbek QR Eńbek jáne halyqty áleýmettik qorǵaý mınıstrligimen (budan ári - EHÁQM) yntymaqtastyq aıasynda BTS Digital kompanııasy (Eýrazııalyq Resýrstyq Toptyń seriktesi (ERG) «Jańa mamandyqtar atlasy» (ári qaraı JMA) jobasyn damytý týraly kózqarasyn tanystyrǵanyn aıtty.
«Atlas – aldaǵy 10-15 jylǵa arnalǵan perspektıvaly salalar men mamandyqtardyń boljamdy kartasy. Bul bizge qaı salalardyń belsendi damıtynyn, sol salalarda qandaı jańa tehnologııalar, ónimder, basqarý tájirıbeleriniń paıda bolatynyn jáne jumys berýshiler qandaı jańa mamandyqtardy qajet etetinin túsinýge kómektesedi», - dep túsindirdi ol.
BTS Digital basshysynyń aıtýynsha, JMA-nyń jasalýy qazirgi tańda Qazaqstanda qoldanbaly sıpattaǵy jáne jappaı qoldanýǵa bolatyn balamaly ónimniń joqtyǵymen baılanysty. Mamandyq tańdaýǵa kelgende kóptegen azamattar ata-analarynyń tilekterin, ishki nanym-senimderin basshylyqqa alady jáne sýbektıvti trendterge súıenedi.
«Sondaı-aq, ekonomıkany adekvatty kadrlyq resýrstarmen qamtýǵa kedergi keltiretin, eńbek resýrstarynyń aǵylýyna jáne jumys kúshiniń bosatylýyna baılanysty jeke adamnyń ómir súrý sapasyna, ekonomıkalyq jaǵdaıyna áser etetin birqatar júıelik alǵysharttar men qaýip-qaterler bar. Negizgi faktorlardy eki kategorııaǵa bólip qarastyrýǵa bolady. Birinshisine mamandardy daıyndaýǵa degen talaptardyń sıpaty men jyldamdyǵyn ózgertetin obektıvti jahandyq terendter kiredi. Máselen, kásipterdi ózgertip, joıatyn, tipti, jańa mamandyqtardyń paıda bolýyna alyp keletin tehnologııalyq ózgeristerdiń údemeli jyldamdyǵy, tolassyz sıfrlandyrý sııaqty. Ekinshi kategorııa birinshi sanattan shyqqan faktorlarǵa jaýap bere almaýynan týyndaıtyn jaǵymsyz saldardy bildiredi. Mysaly, kadrlar qajettiligin boljaý júıesiniń joqtyǵy, biliktilik teńgerimsizdigi, jumys kúshiniń eńbek daǵdylarna jáne klassıkalyq bilimniń eńbek naryǵynyń suranysyna sáıkes kelmeýi sııaqty», - dedi Nurbek.
«JMA jasaý úshin zertteý ádistemesi Halyqaralyq Eńbek Uıymy, Reseı Federasııasynyń Strategııalyq bastamalary agenttigi jáne Skolkovo Máskeý basqarý mektebiniń (RF) jasaǵan «Tehnologııalyq Forsaıt quzyreti» (Skills Technology Foresight) ádisi negizinde qurylady.
Qazaqstanda bul baǵyttaǵy alǵashqy qadamdardy ERG jasady. Ol Halyqaralyq eńbek uıymymen jáne Reseı Federasııasynyń Prezıdenti janyndaǵy Strategııalyq bastamalar agenttigimen birlesip elimizdiń taý-ken óndirisinde jańa mamandyqtardyń atlasyn qurý boıynsha belsendi jumys isteıdi. Osy jyldyń qańtar aıynda RF SBA kúshimen Qazaqstanda birinshi bolyp BTS Digital sarapshylar toby oqytyldy. Mamyr aıynda Aqtóbe oblysy Hromtaý qalasyndaǵy Don taý-ken baıytý fabrıkasy bazasynda pılottyq forsaıt-zertteý júrgizildi. Nátıjesinde kásiporyndar men salalardyń keıpin ózgertetin 45 trend, 7 joǵalyp jáne 13 ózgerip bara jatqan kásip, 26 jańa kásip anyqtaldy. Zertteý nátıjeleri taý-ken ónerkásibindegi jańa mamandyqtar Atlasynyń negizin qalaıdy », - dedi BTS Digital basshysy.
Jańa mamandyqtar atlasyn ekonomıkanyń 9 basym sektorynyń negizinde jasaý usynylady: taý-ken metallýrgııa kesheni, munaı-gaz, aýyl sharýashylyǵy, kólik jáne logıstıka, mashına jasaý, aqparattyq-kommýnıkasııalyq tehnologııalar, energetıka, týrızm jáne qurylys. Aıta ketý kerek, taý-ken ónerkásibindegi jańa mamandyqtardyń atlasy osy jyldyń jeltoqsan aıynda ERG esebinen ázirlenedi.
«Qalǵan 8 sektordaǵy jańa mamandyqtardyń atlasyn daıyndaý úshin qazirgi ýaqytta QR EHÁQM jáne Dúnıejúzilik banktiń birlesken jobasyn iske qosý jumystary júrgizilýde. Sonymen birge, joba aıasynda bul quraldyń keń qol jetimdiligin qamtamasyz etý úshin ınteraktıvti veb-saıt pen Qazaqstannyń jańa mamandyqtary atlasynyń mobıldi qosymshasyn jasaý josparlap otyr. Budan basqa, tehnologııalyq forsaıt quzyreti ádistemesin zańnamalyq turǵydan bekitý týraly usynystar jasalady. Sonymen birge, BTS Education Qazaqstandaǵy tehnologııalyq forsaıt ádistemesiniń jalǵyz tasymaldaýshysy jáne ıesi retinde jańa mamandyqtardyń atlasyn jasaý kezinde seriktestik tanytytyp kórsetilgen 9 salanyń barlyǵynda tegin ádistemelik qoldaý kórsetýge daıyn», - dedi Saıasat Nurbek.
Otyrys qorytyndysy boıynsha QR Premer-Mınıstriniń orynbasary Eńbek jáne halyqty áleýmettik qorǵaý mınıstrligine ortalyq memlekettik organdarmen birlesip, 1 qazanǵa deıin Qazaqstannyń jańa mamandyqtary atlasyn damytýdyń Jol kartasyn ázirleýdi, sondaı-aq osy úderiske qatysatyn sarapshylarǵa qoıylatyn biliktilik talaptaryn aıqyndaýdy tapsyrdy.
Buryn habarlanǵandaı, is-shara aıasynda Berdibek Saparbaevtyń tapsyrmasyna sáıkes qurylǵan QR Eńbek jáne halyqty áleýmettik qorǵaý mınıstrligi Eńbek resýrstaryn damytý ortalyǵy janyndaǵy (budan ári - ERDO) Jobalyq keńestiń tanystyrylymy ótti.
ERDO prezıdenti Tamara Dúısenova jańa qurylym Eńbek jáne halyqty áleýmettik qorǵaý mınıstrligi jumysynyń tórt negizgi baǵyty: ulttyq biliktilik júıesi, nátıjeli jumyspen qamtý, ataýly áleýmettik kómek, áleýmettik-eńbek salasyn sıfrlandyrý boıynsha áleýmettik-eńbek salasyn damytý jónindegi jobalardy iske asyratynyn aıtty.
«Jobalyq menedjmentti qoldana otyryp jasalǵan dál osy baǵyt barlyq qatysýshylar arasyndaǵy ózara is-qımyldyń naqty júıesin qurýǵa, sondaı-aq barlyq baǵyttarda týyndaǵan máselelerdi jedel sheshýge múmkindik beredi», - dedi Dúısenova.