Sonaý bir jyldary, naqtyraq aıtsaq, osydan 43 jyl buryn Ánýar Álimjanov aǵamyz Jazýshylar odaǵy basqarmasynyń tóraǵasy bolyp turǵan kezde Azııa, Afrıka jazýshylarynyń konferensııasy bolǵan dep estıtinbiz. Keńestik kezeńniń de jaqsy dúnıeleri boldy. Keńestik ıdeologııa ádebıetti basty qarýy retinde, tárbıe quraly retinde paıdalandy ári úlken qoldaý kórsetti, jazýshylarǵa qamqorlyq jasady.
Keıingi jyldary ádebıetter baılanysy úzilip qaldy. Dúnıejúzilik ádebı prosestiń quramdas bóligi retinde qazaq ádebıeti de damyp keledi. Endi osy ótkizilgeli otyrǵan Azııa elderi jazýshylarynyń I forýmy 4-6 qyrkúıek arasynda Nur-Sultan qalasynda bastalmaqshy. Negizgi maqsat – jalpy qoǵamdaǵy ádebıettiń rólin kóterý, jazýshy mártebesin asqaqtatý. Sol arqyly ádebıetti basty tárbıe quralyna aınaldyrýǵa yqpal etý.
Forýmda kóptegen másele kóteriledi. Máselen, Ońtústik Koreıanyń tanymal jazýshysy Ko Yn «HHI ǵasyr poezııasyndaǵy jalǵyzdyq máselesi» degen taqyrypta baıandama jasaıdy. Qatar elinen keletin Nobel syılyǵyna úmitker Moza ál-Malkı «Álemdik ádebıettegi Azııa adamynyń beınesi», Dúnıejúzilik Aqyndar kongresiniń prezıdenti, monǵolııalyq Mend – «Azııa poezııasynyń álemdik ádebıetke áseri» degen taqyrypta áńgime órbitedi.
Ázerbaıjan Jazýshylar odaǵynyń tóraǵasy Anar Rzaev, Eýrazııa Jazýshylar odaǵynyń tóraǵasy Iаkýb beı О́meroǵly túrki tektes ádebıettiń búgingi hal-ahýaly týraly sóz qozǵaıdy.
Qazaqstannan Oljas Súleımenov, Tólen Ábdik, Qabdesh Jumadilov, Ánes Saraı, Beksultan Nurjekeuly, t.b. jazýshylarymyzdyń sóz sóıleýi kútilýde.
Elimizdiń barlyq óńirlerinen, Almaty men astanadan 200-deı qalamger qatysady. Azııanyń Japonııa, Malaızııa, Qytaı, Saýd Arabııasy, Iordanııa, Ońtústik Koreıasyndy 40-qa jýyq elinen delegat kelmekshi.
Bizdiń qalamgerlerimizdiń shyǵarmalary sol elderge, al Azııa memleketteri jazýshylary shyǵarmalary bizdiń tilimizge aýdarylmaqshy. Mundaı úlken halyqaralyq basqosýdyń ádebıetimizdiń kóshiniń ilgeri damýyna aıtarlyqtaı yqpal etetinine senemin.
Baýyrjan JAQYP,
aqyn