Eń aldymen, Qazaqstan Jazýshylar odaǵynyń biraz jylǵa sozylǵan toqyraýdan keıin zaman talabyna saı qareket jasaı bastaǵanyn aıtar edim. Birshama ýaqyt buryn el astanasynda Eýrazııa astanalary aqyn-jazýshylarynyń jıynyn ótkizgenin, Almatydaǵy Shyǵarmashylyq úıdi qala ákiminiń qoldaýymen qaıta jańǵyrtyp, qalamgerlerdiń ıgiligine berýin, prozalyq shyǵarmalardy álemniń alty tiline aýdarta bastaýyn jáne aldaǵy Azııa qalamgerleriniń I forýmyn uıymdastyrýy – oıaný ǵana emes, oıly sharýanyń basy jáne biregeıi.
Erteńgi bolar forým ádebıetimizdiń ózge jurtpen terezesin teń kórsete alýyna ıgi qadam bolyp otyr. Álem ádebıetiniń ozyq úlgilerimen biraz tanys bolǵandyqtan, halyqaralyq syılyq ıeleriniń shyǵarmalaryn óz ádebıetimizdiń tańdaýly úlgilerimen salystyryp qarasaq, aqyndarymyz Q.Amanjolov, S.Máýlenov, Tumanbaı men Saǵılardy aıtpaǵanda T.Medetbek, S.Aqsuńqaruly, E.Raýshan, J.Bódesh, prozashylarymyz M.Maǵaýın, T.Ábdik, T.Nurmaǵanbetov, J.Shashtaıuly, B.Nurjeke, R.Otarbaev, N.Dáýtaıuly, Á.Asqar, M.Baıǵuttyń shyǵarmalary aýdarýy kelisse, álem ádebıetin tańdandyrary haq. Budan bólek, tuıaq dúbirleri alty qyrdyń ar jaǵynan estiletin daryndy jastarymyz qanshama. Álem bilse, Abaıdy, Áýezovti, Nurpeıisovti biler. Basqasynan álem múlde habarsyz. Ádebıeti álsiz eldi qansha jerden ekonomıkasy myqty bolǵanymen, álem moıyndamaıdy.
Forým qazaq ádebıetin tanytýǵa kúsh salýy kerek. Bul da jarnamalyq qyzmettiń bir túri. Demek, shet tilge aýdarylatyn qazaq avtorlarynyń tańdaýly shyǵarmalaryn arnaıy komıssııa men Jazýshylar odaǵy iriktep, qolǵa alsa deımin. Bul jerde aǵaıyndyq emes, aqıqat, ókpe-naz emes, ádilet tóreshi bolsa kerek.
Aqyn-jazýshylardyń alys-jaqyn shetelmen shyǵarmashylyq baılanysyna tolyqtaı jaǵdaı jasaǵan jón. Oǵan qosa jas qalamgerlerdiń toptama jınaqtaryn memlekettik tapsyryspen jylyna bir ret shyǵaryp jatsa, úlken qamqorlyq emes pe?!
Jazýshy Á.Asqar burynǵy «Aýdarma» baspasyn qaıta jandandyryp, jumysyn júrgizse, ádebı aýdarmaǵa qozǵaý salar edi. Forýmda osy atalǵan máseleler qozǵalar dep senemin. Ádebıetimizdi álsiretip almaý jazýshylardyń ǵana emes, memlekettiń de parqy mol paryzy.
Kádirbek SEGIZBAIULY,
jazýshy