Qostanaı qalasynyń 140 jyldyq merekesi qarsańynda qalanyń ortalyǵynda «Tobyl oıshyly» atalyp ketken Qola dáýiri jádigeriniń úlkeıtilgen kóshirme músini paıda boldy. Muny qostanaılyq músinshiler Egor Kıslısın men Vladıslav Galbın osydan eki jyl buryn jasaǵan bolatyn.
Jigitter kisi boıynan úlken músindi óziniń túpnusqasynan aýdarmaı 3 aıda jasap shyǵardy. Biraq osyǵan deıin ol músinshiler sheberhanasynda turatyn.
«Tobyl oıshylynyń» túpnusqasy oblystyq tarıhı-ólketaný mýzeıinde kóp jyldar turdy. Osyndaı asa sırek kezdesetin jádiger alǵashqy kezde shynyǵa da salynǵan joq. Arheologııadan, músin ónerinen alys adamdardyń ózi onyń qasynda kóp aınalsoqtap, qatty qyzyqtaıtyn, tipti qolǵa ustap kóretin.
– Osydan 2-3 myń jyl burynǵy ejelgi atalarymyzdyń oılanyp otyrǵan adamnyń músinin tastan oıǵan sheberligi tańdaı qaqtyrady. Adamnyń bet álpetin keltirýden buryn oryndalý tehnıkasynyń ózi tańdandyrmaı qoımaıdy. Músinniń minsiz tegistigi tolyp jatqan tehnologııamen, tehnıkamen jumys isteıtin HHI ǵasyr músinshileriniń kez kelgenin oılandyrady. Biz «Tobyl oıshyly» keń tanylýy, tarıhymyzdy búgingi urpaq bile túsýi úshin onyń músinin oıýdy qolǵa alǵan edik – deıdi músinshi Egor Kıslısın.
Músinshiler «Tobyl oıshylynyń» jalpy túrin aýdyrmaı keltirgenimen, ony dál ózindeı jyltyratyp qyrnamaı, shyǵarmashylyq qııalǵa erik beripti. Júrelep otyrǵan adam músinine qazaq dalasyndaǵy tańbaly tastardaǵy ejelgi sýretterdi beıneledi.
«Tobyl oıshyly» atalyp ketken salmaǵy 4 kılogramm, turqy 25 santımetrdeı bolatyn tas músin 1976 jyly Qostanaı qalasynyń irgesindegi «Mıchýrın» keńsharynyń egis dalasynan tabylǵan bolatyn. Ol osy kezge deıin syryn ishine búgip, tek tańǵaldyrýmen ǵana keledi. Onyń túpnusqasy búginde Nur-Sultan qalasyndaǵy elimizdiń Ulttyq mýzeıinde tur.
QOSTANAI