Aqmola oblysynda aýyl áıelderiniń forýmy ótkizilip, onda aýyldyq jerlerdiń áleýmettik-ekonomıkalyq damýy, aýyl áıelderi men qyz-kelinshekteriniń qoǵamda alatyn orny, olardy qoǵamdyq-saıası, mádenı ómirdiń ár salasynda, orta jáne shaǵyn bızneste qoldap, jumysqa ornalastyrý tárizdi ózekti máseleler talqylandy.
Forýmǵa Parlament Májilisiniń depýtaty Maıra Aısına, Eńbek jáne halyqty áleýmettik qorǵaý vıse-mınıstri Aqmádı Sarbasov, Ulttyq ekonomıka vıse-mınıstri Aıgúl Shaıymova, «Jasyl» ekonomıka jáne Global damytý koalısııasy» zańdy tulǵalar birlestiginiń basqarma tóraıymy Saltanat Raqymbekova jáne Aqmola oblysy ákiminiń orynbasary Aına Mysyrálimova qatysty. Osyndaı shara oblysta ekinshi ret ótkizilip otyr. Ony «Coca-cola» halyqaralyq qory men Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen Aqmola oblysynyń ákimdigi, G-Global Halyqaralyq hatshylyǵy, «Jasyl» ekonomıka jáne Global-dy damytý koalısııasy» jáne «Qazaqstan áıelderiniń agrarlyq odaǵy» birlestikteri uıymdastyrdy.
Májilis depýtaty Maıra Aısına búginde el turǵyndarynyń 52, nurotandyqtardyń 56 paıyzyn názik jandylar quraıtyny jaıly derekterdi keltirdi. Áıelder qaı salada eńbek etse de, belsendilik tanytýda. Nur Otan partııasynyń saılaýaldy baǵdarlamasy «Ár halyqtyń ómirinde óziniń naǵyz ulttyq bolmysyn, ulttyq namysyn kórsetetin kezeń keledi» degen maǵynaly sózdermen bastalady. Meniń oıymsha biz, áıelder qaýymy osy sózderge mán berýimiz kerek. Búginde ekonomıka salasynda áıelderdiń róli aıryqsha. Halyqaralyq valıýta qory sarapshylarynyń tujyrymy boıynsha sulýlyq álemdi ǵana emes, jahandyq ekonomıkany da qutqara alady. Munymen kelispeý múmkin emes. Qazirgi tańda elimizdegi eńbekke qabiletti 9 mıllıon adamnyń shamamen 40 paıyzyn áıelder qaýymy quraıdy. Ishki jalpy ónimniń árbir úshinshi bóligin solar shyǵarady. Sol sebepti áıelderdiń áleýetin meılinshe kóbirek qoldana bilýimiz kerek. «Coca-cola» halyqaralyq qory 2020 jylǵa deıin álem boıynsha 5 mln-ǵa jýyq jumyssyz áıeldi oqytýdy qolǵa aldy. Solarmen birlesip, jeti jyldan beri aýyldyq jerlerde turatyn 11 myńǵa jýyq jumyssyz áıeldi kásipkerlik negizderine oqyttyq. Birazyna óz kásibin ashýǵa qaıtarymsyz grant bólindi, – deı kele, Maıra Arapqyzy «Aýyl – el besigi» jobasyna toqtaldy.
Forýmda aýyldarǵa «jasyl» tehnologııalardy bireý ákelip engizedi dep kútip otyrmaı, turǵyndar óz kúshterin, qabiletterin paıdalanyp, úıde, mektepterde qoldanýǵa bolatyny keńinen sóz boldy. Ásirese Arshaly aýdanyna qarasty Arnasaı aýlynda ashylǵan «Jasyl» tehnologııalardyń ulttyq akademııasy» ortalyǵy jaıly kóptegen oń mysal keltirildi.
– Elbasymyz Nursultan Nazarbaev 2018 jyly Qazaqstan halqyna arnaǵan Joldaýynda «Aýyl – el besigi» jobasyn iske asyrýdy tapsyrǵan bolatyn. «Aýylym – altyn besik» dep biletin turǵyndar úshin bul jobanyń orny erekshe. Osyǵan sáıkes oblysymyzda naqty ister qolǵa alyndy. Búginde Arshaly, Astrahan, Zerendi aýdandarynda baǵdarlama aıasynda keshendi jumystar bastaldy, – dedi oblys ákiminiń orynbasary Aına Mysyrálimova.
О́ńirde memlekettik basqarý organdarynda eńbek etetin áıelderdiń úlesi artyp keledi. Barlyq deńgeıdegi máslıhattardaǵy 276 depýtattyń 70-in názik jandylar quraıdy. 532 jergilikti atqarýshy organnyń 147-isinde áıelder basshylyq qyzmetterde. 56 áıel aýyldyq okrýgterdiń ákimderi bolyp qyzmet etýde. Sharýa qojalyqtaryn basqaryp otyrǵan áıelder de bar. Shamamen 400 áıel «Nátıjeli jumyspen qamtýdy jáne jappaı kásipkerlikti damytý» baǵdarlamasy arqyly óz kásipterin dóńgeletip otyr. Bıyl 662 áıel kásipkerlik negizderine oqytylǵan.
Forýmǵa arnaıy kelgen basqa da meımandar óz oılaryn ortaǵa salyp, «Aýyldyq aımaqtardyń áleýmettik-ekonomıkalyq damýy», «Jergilikti ózin-ózi basqarýdy damytý, bıýdjettiń tórtinshi deńgeıi» taqyryptaryn plenarlyq otyrystarda keńinen talqylady. Aýdandardan kelgen qatysýshylar mınıstrlik ókilderine tolǵandyrǵan saýaldaryn qoıyp, usynystaryn jetkizdi.
Aqmola oblysy