14 qyrkúıek kúni Olımpıada chempıony Danııar Eleýsinov (7-0, 3 KO) amerıkalyq boksshy Reshard Hıkspen (12-0-1, 6 KO) judyryqtasady. Bul Danııar Eleýsinovtiń kásipqoı bokstaǵy segizinshi kezdesýi.
Shara Nıý-Iork qalasyndaǵy áıgili Madison Square Garden arenasynda on raýndtyq formatta ótedi. Eleýsinov-Hıks kezdesýi WBC tujyrymy boıynsha jeńil salmaqtaǵy «ýaqytsha» chempıon tıtýly úshin amerıkalyq Devın Heını (22-0, 14 KO) jáne reseılik Zaýr Abdýllaev (11-0, 7 KO) arasyndaǵy boks keshiniń aıasynda bolady.
Eleýsinov pen Hıks arasyndaǵy jekpe-jekti 14 qyrkúıek kúni saǵat 06:00-de «Habar» telearnasy tikeleı efırde kórsetedi.
Aıta keteıik, Danııar Eleýsinov – 28 jasar qazaqstandyq boksshy, kásibı bokstaǵy alǵashqy jekpe-jegi 2018 jyldyń 28 sáýiri kúni Nıý-Iork qalasynda ótti. Kezdesýde boksshy amerıkalyq Noa Kıddty úshinshi raýndta nokaýtqa jiberdi. Sońǵy jekpe-jeginde Lýıs Norambýen (3-1-1, 2 KO) kezdesip, alty raýnd aıqasty. Nátıjesinde tóreshilerdiń sheshimimen Eleýsinov jeńimpaz atandy (60-54, 60-54, 59-55).
Reshard Hıks – 34 jasar amerıkalyq boksshy, kásipqoı rıngte ótkizgen 13 jekpe jektiń 12-ine jeńiske jetip, bir ret teń túsken.