О́rt – tilsiz jaý, apat aıtyp kelmeıdi. Keshikseń – keshirmeıdi. Sál tosylsań, tajal áp-sátte-aq aınalasyn jalmaıdy. Sondyqtan tilsiz jaýmen kúresetin azamattyń da erik-jigeri myqty, jaýjúrek bolǵany jón. Kúni keshe Túrkistan qalasyndaǵy «Royal Grand» qonaqúıinde oryn alǵan oqıǵada órt sóndirýshiler osy talaptan tabylyp, kásibı sheberlikteriniń joǵary ekendigin kórsetti.
Búginde olardyń eren eńbegi men erligi joǵary baǵalanyp otyr. Prezıdent Q.Toqaev Twitter-degi paraqshasynda «Túrkistandaǵy qonaqúıde bolǵan órtten zardap shekken IIM qyzmetkerleriniń tez saýyǵyp ketýin tileımin. Olardyń eren eńbekteri memlekettik nagradalarǵa laıyq», dep jazdy.
Aldyn ala berilgen málimetterge súıensek, Túrkistan qalasynda ornalasqan «Royal Grand» qonaqúıinde oryn alǵan órt gaz sısternasyn toltyrý kezinde shyqqan. Gaz tasıtyn kólik júrgizýshisi ári operator Talǵat Zulfaıdarovtyń aıtýynsha, qonaqúıdiń sısternasy aıyna bir ret gazben toltyrylady. Kinárat ózi men kóliginde emes, qonaqúı qyzmetkerinen bolǵanyn aıtqan kólik júrgizýshisiniń paıymdaýynsha, gaz jınalyp qalyp, ashanaǵa jetken. Jarylys saldarynan qonaqúı mańyndaǵy úılerdiń terezesi qırap, shatyrlary ushqan. Búlingen nysandardyń naqty sany anyqtalýda. Ásirese meımanhana irgesinde ornalasqan 150 oryndyq balabaqsha qyzmetkerleri qatty shoshyǵan. Jarylys balalardyń barlyǵy úılerine qaıtyp ketken soń oryn alǵan.
Shamamen 1400 sharshy metrdi sharpyǵan órt saldarynan barlyǵy 11 adam zardap shekken, 6 órt sóndirý qyzmetkeri medısınalyq kómekke júgingen. Sondaı-aq 3 polısııa qyzmetkeri jáne 2 qala turǵynyna medısınalyq járdem kórsetilgen. Ortalyq qalalyq aýrýhanaǵa bes zardap shegýshi jetkizilgen. Oqıǵa ornynda óz mindetterin minsiz atqarǵan tótenshe jaǵdaı departamenti qyzmetkerleri men polıseıler jedel áreketteri arqyly qaıǵyly jaǵdaıǵa jetkizbedi. Oblystyq tótenshe jaǵdaılar jónindegi departament basshysy, azamattyq qorǵaý polkovnıgi Nurǵalı Júnisov tilsiz jaýdyń oryn alýyna gaz sısternasynyń jarylýy sebep bolǵanyn málimdedi. О́rtti sóndirýge Túrkistan oblysy TJD jeke quramynan 70 adam jáne 14 órt sóndirý tehnıkasy jumyldyrylǵan.
О́rt kezinde patrýldik polısııa batalon komandıriniń orynbasary, polısııa maıory Qanat Raqyshev pen Túrkistan qalalyq tótenshe jaǵdaılar basqarmasynyń azamattyq qorǵaý maıory Bolat Túımenov adam shyǵynyn boldyrmaý úshin barlyq bólmelerdi tekserip, órt sharpyǵan ǵımarattan 4 jasar qyzdy jáne Túrkııanyń eki azamatyn qutqarǵan. О́rtti aýyzdyqtaý barysynda Túrkistan oblysy TJQ-niń 4 qyzmetkeri jaraqattanyp, túrli dárejedegi kúıikterimen ortalyq aýrýhanaǵa jatqyzylǵan. Olardyń arasynda jansaqtaý bóliminde jatqan Túrkistan oblysy TJQ QB bastyǵynyń orynbasary, azamattyq qorǵaý podpolkovnıgi Baqytjan Abdýǵapparov bar. Osy arada aıta ketelik, B.Abdýǵapparov Arys qalasyndaǵy jarylys kezinde de minsiz qyzmetimen turǵyndardyń alǵysyna bólengen bolatyn. Sol kezdegi erligi men eńbegi joǵary baǵalanǵan azamattyq qorǵaý podpolkovnıgi «Erligi úshin» medalimen marapattaldy. Keshegi tilsiz jaýmen kúreste de B.Abdýǵapparov aldyńǵy shepten tabyldy.
О́zgelerdiń qaýipsizdigin birinshi kezekke qoıǵan azamattardyń jaǵdaıyn bilýge Ishki ister mınıstri Erlan Turǵymbaev pen Densaýlyq saqtaý mınıstri Eljan Birtanov Túrkistan qalalyq aýrýhanasyna bardy. Mınıstrler aýrýhanada kúıik shalyp jatqan tótenshe jaǵdaı qyzmetkerleriniń halin surap, barlyq qajetti kómek kórsetiletinin aıtty. Qalalyq ortalyq aýrýhana bas dárigeriniń orynbasary Ámirhan Sandybaevtyń aıtýynsha, Baqytjan Abdýǵapparovtyń qazirgi jaǵdaıy ortasha dárejede. «Ony travmatologııa bólimine aýystyrý josparlanýda. Qalǵan úsh órt sóndirýshi de travmatologııa bóliminde jatyr. Olardyń ekeýin kúıik shalǵan, al bireýiniń buǵanasy synǵan. Qazir olar qajetti em sharalaryn alýda. Jaǵdaılary ortasha dárejede. О́mirlerine eshqandaı qaýip joq», deıdi dáriger.
«Royal Grand» qonaqúıine qonystanǵandar arasynda Túrkistan qalasyna ǵylymı konferensııaǵa kelgen sheteldik azamattar da bar. Búginde olar órt kezinde ómirlerin aman alyp qalǵan polısııa qyzmetkerlerine alǵys aıtýda. Túrkııa azamattary professor Hashım О́zýdoǵrý men onyń áriptesi professor Nurıtdın Paryltynyń aıtýynsha, órt shyqqanda olar úshinshi qabatta bolǵan. Sodan keıin otqa oranyp jatqan tómengi qabatqa qaraı túsýge júreksinip turǵan sátte qonaqúıde qalǵan adamdardy izdegen polısııa qyzmetkeri baıqap qalady. Sóıtip Túrkistan oblysy PD JPQ patrýldik polısııa batalony komandıriniń orynbasary, polısııa maıory Qanat Raqyshev Túrkııa azamattaryn qaýipsiz jerge din aman alyp shyǵady.
Qazirgi ýaqytta osy oqıǵaǵa qatysty Túrkistan qalalyq polısııa basqarmasynyń tergeýshileri Qylmystyq kodekstiń 292-baby «О́rt qaýipsizdigi talaptaryn buzý» boıynsha sotqa deıingi tergep-tekserý amaldary júrgizilýde. Saraptamalar taǵaıyndalǵan.
Túrkistan oblysy