Sonaý 1957 jyldyń qyrkúıek aıy edi. «Lenınshil jas» gazetinde birli-jarym eresek adamdar bolmasa, deni jas jigitter jumys isteıtin. Olar shetinen úılenip, jıi-jıi toılaryn ótkizip jatatyn.
Sol jyldyń jazynda Ábekeń (Ábilfaıyz ben Zarıa), sosyn biz – Sapekeń ekeýmiz (Sapar Baıjanov) turmys qurǵanbyz. Úlken armandar jeteginde jastyq qyzyǵyna toımaı, jaqsy kúnderimiz ótip jatty.
Mine, sol sátten bastalǵan ádemi syılastyq, jarasty qarym-qatynas názik dostyqqa aınalyp, bar ómirimizdi shat-shadyman kúıge bólegen edi. Bizdiń árbir kezdesken sátterimiz áýelegen ánge, ádemi bıge, jarasty ázil-qaljyńǵa, oı-óristi ósirer tereń mazmundy pikir almasýlarǵa toly, ǵajaıyp, umytylmastaı áserlerge bóleıtin.
Sol qyzyqty dáýrenniń bir kúni, shamamen budan 30 jyldaı buryn Ábekeń aıaqastynan aýyr naýqasqa dýshar bolmasy bar ma?!
Kóńilin suraı barsaq, Ábekeńniń kóńili pás. Burynǵy ǵajaıyp kúnder kelmeske ketkendeı nalyp, ómirden túńilip otyrǵany baıqaldy.
Sonda Sapekeń: «Shıki et – aýyrmaq úshin» degen atam qazaq. Mynaý ǵajaıyp ómirdi, bulbuldaı saıraǵan Zarıańdy, abyroıyńdy asyrǵan Erlan ulyńdy, qaraqat kóz Quralaıyńdy, ári-beriden soń myna bizderdeı dostaryńdy qııýǵa qalaı dátiń bardy?
Aýrýǵa berilmeı, ózińdi qolǵa alsań, dárigerdiń kómegine súıenseń, Alla jazsa, áli-aq táýir bolyp, qatarǵa qosylyp ketesiń. Bile bilseń ómirge qulshynystyń ózi aýrýdy jeńedi. Aýyr oıdan aýlaq bol!», dep toqtaý aıtqan edi.
Aıtqandaı-aq Ábekeń birte-birte táýir bolyp, qatarymyzǵa qosyldy. О́zi «Tańsholpan» ataǵan Zarıasymen qosylyp, án aıtyp, tom-tom kitap jazyp, toı-tomalaqtan qalmaı, bala-shaǵasynyń qyzyǵymen ómir keship kelgen. Osydan bes-alty jyl buryn ómiriniń máni men sánine aınalǵan Zarıanyń qazasy Ábekeńe ońaı bolmady. Jıi-jıi aýyra berdi, bertin kele jatyp qalyp edi. Endi mine, ómirmen birjolata qoshtasty.
Máńgilik eshteńe joq degendi aıtamyz ǵoı, ajal – basy jumyr pendeniń bárine ortaq. Degenmen, kim jaqyn dosyn ólimge qııady deısiń? Amal ne, qoldan keler shara joq.
Ábekeń jaqsy ómir súrdi, aıanbaı eńbek etti. Artyna mol mura qaldyrdy, jaqsy izi saırap jatyr. Endi tek ımanyń joldas bolsyn! Alla qabirińdi nurǵa bólesin! О́zińdi sonshama jyl kútip-baqqan, jas ómirin aǵasynyń amandyǵyna arnaǵan Raıhan qaryndasyńa Allanyń saýaby jazylsyn! О́mirińdi sán-saltanatqa bólegen abyroıyńdy asqaqtatqan qoǵam qaıratkeri Erlan balańa, Quralaı qyzyńa, nemere-shóberelerińe Alla uzaq ta baıandy ǵumyr bersin. Baqul bol, qaıran dos!
Kúlásh BEISENBIEVA