Búkilálemdik boks akademııasy men ProSport medısınalyq ortalyǵynyń bazasynda «Joǵary deńgeıli sportshylardy daıyndaý júıesindegi medısınalyq qamtýǵa mýltıdıssıplınarly tásil» atty ǵylymı-tájirıbelik konferensııa ótti dep habarlaıdy Olympic.kz.
Sporttyq medısına taqyrybyndaǵy aýqymdy is-shara Qazaqstanda alǵash ret ótkizilip otyr. Konferensııany Qazaqstan Ulttyq Olımpıadalyq komıteti «Olımpıadalyq yntymaqtastyq» baǵdarlamasynyń qoldaýymen uıymdastyrdy. Sondaı-aq, bul jıyn PROSPORT zamanaýı sport ortalyǵynyń ashylýyna oraılastyrylǵan. Ashylý saltanatyna Halyqaralyq dzıýdo federasııasynyń prezıdenti Marıýs Vızer, Qazaqstan UOK vıse-prezıdenti Danııar Abýlgazın, QR mádenıet jáne sport vıse-mınıstri Eldos Ramazanov qatysty.
Sporttyq-medısınalyq ortalyqtaǵy jańa tehnıkalyq jabdyqtar men qyzmet kórsetý aýqymynyń keńdigi álemdik deńgeıdegi sportshylar men salaýatty ómir saltyn ustanatyn qarapaıym jandarǵa sapaly dıagnostıkalyq, medısınalyq jáne reabılıtasııalyq qyzmet kórsetýge múmkindik beredi.
«Jaqynda UOK bas Assambleıasynyń otyrysy ótip, Tımýr Asqaruly Qulybaev atalǵan uıymnyń prezıdenti qyzmetine qaıta saılanǵanyn bilesizder. Alǵash ret ony basshylyq qyzmetke 2015 jyly saılady. Sol kezden bastap Tımýr Asqaruly bizdiń sportshylardy medısınalyq turǵydan qamtamasyz etýdi jetildirý jaǵyn qolǵa alǵan. Jobany iske asyrý maqsatynda barlyq olımpıadalyq sport túrleri keshendi ǵylymı toptarmen jabdyqtaldy. PROSPORT medısınalyq ortalyǵy - bizdiń alǵashqy qarlyǵashymyz. Ekinshi ortalyq Nur-Sultanda ashylady.
Baıandama jasap, óz tájirıbelerimen bóliskender qatarynda HOK ókili, Aspetara sporttyq medısına ortalyǵynyń klınıkalyq jobalar jónindegi reabılıtasııa jáne ortopedııa gospıtali sapasy jónindegi Departament dırektorynyń orynbasary Rod Ýaıtlı, Búkilálemdik dopıngke qarsy agenttiktiń sportshynyń bıologııalyq pasporty jónindegi sarapshylar tobynyń jetekshisi, Búkilálemdik dopıngke qarsy agenttik múshesi doktor Iork Olaf Shýmaher, Halyqaralyq Olımpıada komıtetiniń medısına jáne ǵylymı komıssııasynyń múshesi, Braıton ýnıversıtetiniń sporttyq ǵylym jónindegi professory Iаnıs Pıtsıladıs, Ýkraına dene tárbıesi jáne sport ulttyq ýnıversıtetiniń olımpıadalyq sport tarıhy men teorııasy kafedrasynyń professory Vladımır Platonovtar bar.
Konferensııa baıandama jáne arnaıy sheberlik saǵattary formatynda ótti. Sporttyq medısına salasyndaǵy mańyzdy taqyryp men saýaldardy keńirek qaýzaý úshin jıyn úsh iri bólimnen turdy. Olar – «Sporttyq medısına», «Fýnksıonaldy dıagnostıka, ońaltý jáne jattyǵý úderisi» jáne «Sporttaǵy psıhologııa». Qatysýshylar sportshylardyń Olımpıada oıyndaryna daıyndyǵy, jarys aldynda jáne jarys kezinde qalpyna kelý negizderi men atletterdi keshendi túrde tekserýge arnalǵan zamanaýı ádister týrasynda áńgime órbitti.
HOK ókili Rod Ýaıtlı olımpıadashylardy ońaltýǵa qatysty sheberlik sabaǵyn ótkizdi. Sonymen qatar konferensııada farmasevtıkalyq ónimder men jańa medısınalyq tehnologııalarǵa arnalǵan kórme uıymdastyryldy.
Aıta ketelik, konferensııaǵa qatysý úshin 200-den asa adam tirkeldi. Olardyń arasnyda medısına ýnıversıtetteriniń ókilderi, sporttyq dárigerler, dıspanser qyzmetkerleri, bapkerler men antıdonıng salasynyń qyzmetkerleri bar.