Ortalyq kommýnıkasııalar qyzmetinde QR bala quqyqtary jónindegi ýákili Arýjan Saın jáne QR bilim jáne ǵylym vıse-mınıstri Bıbigúl Asylova kámelettik jasqa tolmaǵan jasóspirimderdiń quqyǵyn qorǵaý úshin atqaralyp jatqan jumystar týraly brıfıng ótkizdi.
Eki aı buryn elimizdegi bala quqyqtary jónindegi ýákil retinde taǵaıyndalǵan Arýjan Saın bul saladaǵy kúrdeli máselelerdiń kóp ekenin aıtty.
- Kún saıyn biz balalarǵa qatysty jantúrshigerlik jaǵdaılardy estımiz: balalar sýısıdi, býllıng, jasóspirimder qylmysy taǵysyn taǵy. Bul dabyl sıgnaldary. Shyn máninde óte tereń sebepteri bar jáne eldegi bolashaq krımınogendik jaǵdaıdy aldyn ala anyqtaýymyz kerek. Olar erteń bizdiń qoǵamymyzdyń qalyptasýyna áser etedi, - dedi Arýjan Saın.
Spıkerdiń aıtýynsha, bul máseledegi mańyzdy faktor – eldegi áleýmettik shıelenistiń tómendeýi. Bul problemanyń quramdas bóligi balalardyń mektepten tys damýynyń qol jetimsizdigi. Kez kelgen qazaqstandyq otbasy bıýdjetiniń qomaqty úlesin alatyn aqyly úıirmeler men seksııalarǵa barlyǵy birdeı bara almaıtyny belgili. Al máseleniń sheshimin osyndaı jumystardyń keshendi jasalýynda.
- Men kámeletke tolmaǵandardyń quqyqtaryn qorǵaý salasyndaǵy jaǵdaıdy túbegeıli ózgerte alatynymyzǵa senemin. Meniń jumysym balalar arasyndaǵy sýısıd faktilerin, olarǵa qatysty zorlyq-zombylyq faktilerin, balalar qylmysyn azaıtý jáne tolyq joıýdyń naqty kórsetkishteri boıynsha baǵalanǵanyn qalaımyn, - dedi Arýjan Saın.
Sol maqsatta QR bala quqyqtary jónindegi ýákil jýrnalıster aldynda QR Bilim jáne ǵylym mınıstrligine usynystaryn baıandady. Onyń aıtýynsha barlyq balalardy sport seksııalarynda, kórkem, ǵylymı, teatr úıirmelerinde oqytýǵa kepildik berý jáne jan basyna shaqqandaǵy qarjylandyrýdy qamtamasyz etý. Sonymen qatar jergilikti atqarýshy bılik organdarynyń basym mindetterine mádenıet pen sporttyń, ǵylymnyń barlyq baǵyttary boıynsha balalar men jastardy turatyn jerinen ınfraqurylym qurý jáne uıymdastyrý.
Osylaısha Arýjan Saın kúrdeli máselelerdiń birqatar sheshimin usyndy. Ásirese, memlekettik bıýdjet esebinen ótetin ımıdjdik is-sharalar qysqaryp, esesine elimizdegi balalar úıindegi jáne mektep jasyndaǵy balalardyń jaǵdaıy men qaýipsizdigine basa nazar aýdarý kerektigin aıtty.