Premer-Mınıstrdiń orynbasary Berdibek Saparbaevtyń bastamasymen qolǵa alynǵan festıval Qazaqstannyń halyq jazýshysy, Eńbek eri, Memlekettik syılyqtyń ıegeri, akademık jazýshy Ábish Kekilbaıdyń 80 jyldyǵyna arnalǵan sharalar aıasynda ótýde. Úsh kúnge sozylatyn sharada «Altyn orda» avtorlyq dızaın úıiniń negizin qalaýshy jáne dırektory, «Qurmet» ordeniniń ıegeri Yrza Tursynzada óz bıznesin bastaǵysy keletin kóp balaly analar men áıelder úshin tigin jáne qoldanbaly óner boıynsha tegin sabaqtar men sheberlik saǵatyn ótkizedi.
Respýblıka boıynsha óńirler arasynda alǵashqy bolyp Mańǵystaýda ótkizilip jatqan sharaǵa 200-ge jýyq qyz-kelinshek qatysýda. Áıelder men kóp balaly analardy ulttyq brend arqyly shaǵyn jáne orta bızneske tartý maqsatyndaǵy festıval aıasynda jeke kásibin bastaǵysy keletin qyz-kelinshekter úsh kún trenıng-sabaqtarǵa qatysady. Sonan soń sheberler qolynan shyqqan kórpe, qorjyn, shymyldyq, qamzol, kájekeı, besik jasaýlary syndy ulttyq buıymdar kórmesi ótedi.
- «Kórpe Fest» mega fıstıvali alǵash ret Nur-Sultan qalasynda ótken edi. О́ńirlerde ótkizsem degen oıym sáti túsip Mańǵystaý jerinen bastalyp tur. Men budan úsh jyl buryn Mańǵystaýǵa kelip sheberlik synyptaryn ótkizgenmin, sol kezde dárisimdi tyńdaǵan shákirtterim úsh jyl boıǵy izdenisterin kórmede kórsetetin bolady, ıaǵnı esep berý deýge bolady. Trenıngte burynnan qatysyp kele jatqan qyzdarǵa kúrdeli dızaın tapsyrmalary berilse, jańadan qatysýshylarǵa tehnologııa álippesi úıretiledi, - deıdi Y.Tursynzada.
Mańǵystaý oblysy