Arys qalasyn qalpyna keltirý boıynsha shildeniń ystyǵynda bastalǵan aýqymdy jumystar nátıjesinde zaqymdanǵan 7160 úı jóndeýden ótkizildi. Iаǵnı 36 myń turǵyny bar jańa qala paıda boldy degen sóz. Súrilip, qaıta salynyp jatqan 474 úıdiń negizgi qurylys jumystary aıaqtalǵan, tolyq paıdalanýǵa beriler kún de alys emes, ıaǵnı 3 myńdaı turǵyny bar jańa aýyldyq okrýg boı kóterdi desek te bolady. Onyń ishinde kópqabatty 3 úı bar. Barys shaǵyn aýdanynda árqaısysy 2 páterli 50 úı salynýda. Tolyqtaı jańartylǵan 67 áleýmettik nysannyń 54-i bilim salasynda, 8-i densaýlyq saqtaý mekemeleri, onyń ekeýi jáne 4 sporttyq nysannyń 2-ýi jańadan turǵyzylýda.
Mádenıet saraıy kúrdeli jóndeýden ótip, birinshi jáne ekinshi Arys temir jol vokzaldary jańǵyrtyldy. Avtovokzal, halyqqa qyzmet kórsetý ortalyǵy jáne ákimdik ǵımarattary jóndeldi. 509 kásipkerlik nysandaryn qalpyna keltirýge kómek kórsetildi. Qalany kórkeıtý jumystarynyń aýqymy keńeıe túsip, ortalyq alań men batyrlar alleıasy jańǵyrtyldy. Ábdirazaqov, Baıtursynuly kóshelerindegi úılerdiń aýmaǵy abattandyrylýda. Kópshilik demalatyn «Arbat» salynyp jatqan qaladaǵy ınfraqurylymdy retteý barysynda káriz júıeleri tolyq jóndeýden ótip, avtomattandyrylǵan. Búginde Arys jylytý maýsymyna da tolyq daıyn. Zaqym kelgen kósheler de jóndeýden ótti. Aıaqjol 16 kóshede salynyp, jaryqtandyrý boıynsha jumystar jalǵasýda. Jarylystan bergi úsh aıdan astam ýaqyt aralyǵynda arystyqtardyń baspanasyn qalpyna keltirý jumystary tynymsyz júrgizildi. Jalpy Arys qalasyndaǵy qurylys alańdarynda bas-aıaǵy 134 qurylys kompanııasy jumys istep, 3,8 myńnan astam jumysshy jáne 200-den astam arnaıy tehnıka tartyldy. Apattan aıtarlyqtaı zaqym kelgen «Arys-1» temir jol vokzalynyń ǵımaraty da tolyq jóndeýden ótip, aldyna saıabaq salyndy.
Jýyrda «Qazaqstan temir joly UK» AQ-tyń tóraǵasy Saýat Myńbaev Arys temir jol stansasyndaǵy kólik ınfraqurylymy nysandaryn qalpyna keltirý jumystarymen tanysqan bolatyn. Shoıyn jol nysandarynda júrgizilgen barlyq jóndeý jumystary merziminde aıaqtalǵan. Jarylys saldarynan temir jol torabynda ornalasqan 60-tan astam qyzmettik-tehnıkalyq ǵımarattar, kóptegen turǵyn úılerge zaqym kelgen edi. Qysqa ýaqyt ishinde tolyq qaıta jóndeýden ótken, qala ómirindegi tarıhı da mańyzdy nysan, kóne temir jol vokzaly qurylysyn «Samuryq-Qazyna» ulttyq ál-aýqat qory júrgizdi. Bıyl Arys qalasynyń 1-temir jol vokzalyna 115 jyl tolyp otyr. Irgetasy 1904 jyly qalanǵan kóne ǵımarattyń ishi-syrty tolyq jańartylǵan. Eń bastysy, ǵımarattyń tarıhı sáýleti saqtalǵan, ıaǵnı kóne jádigerlerdiń biri bolyp qala bermek. Jalpy alǵanda toǵyz joldyń torabyndaǵy shahardy qalpyna keltirý jumystary júz paıyz oryndalýǵa jaqyn.
Arys qalasy úsh aıdan astam ýaqyt ishinde jumyla júrgizilgen júıeli de nátıjeli jumystardyń nátıjesinde kóp ózgerdi, jańaryp, ajarlana tústi. Qurylysy aıaqtalyp, paıdalanýǵa berilip jatqan nysandar da barshylyq. Qala turǵyndary solardyń birine, ıaǵnı jýyrda aıaqtalǵan taǵy bir ıgi istiń saltanatty rásimine, Arys shaharyndaǵy sáýletti týyndylardyń birine aınalǵan kireberis qaqpanyń ashylýyna qatysty. Qurylys jumystaryn mindetine alyp, qarjylandyrǵan elimizdiń Kásipodaqtar federasııasy. «О́ńirimizdegi sáýlettik jobalardyń ulttyq naqyshta bolǵany quba-qup. Qazaqylyqtyń qaımaǵy buzylmaǵan aýmaqty aıshyqtaıtyn nyshandar jańa jobalarda kórinis tapqanyna nazar aýdarý óte mańyzdy. Maýsymdaǵy qaıǵyly oqıǵadan keıin qolǵa alynǵan Arys qalasyn jaqsylyqqa bastaıtyn berekeli qaqpa bolady dep senemin», dedi ashylý saltanatynda Túrkistan oblysynyń ákimi О́mirzaq Shókeev. Sonymen qatar óńir basshysy óz sózinde qaqpanyń qurylysyn qoldap, kómek bergen elimizdiń Kásipodaqtar federasııasy basshylyǵyna alǵysyn bildirdi. Qalanyń bas qaqpasy Arys qalasynyń kórkeıip, gúldenýine bir kisideı jumyla kirisý búkil elge ortaq is bolǵanynyń kelesi bir kórinisi ispetti boldy. Saltanatty jıynda Kásipodaqtar federasııasynyń tóraǵasy Eraly Toǵjanov oblys ákimi О́mirzaq Shókeevtiń syn saǵattarda eren eńbektiń úlgisin kórsetkenin atap ótti. Sondaı-aq bul kúni Arys qalasyn qalpyna keltirý jumystaryna atsalysqan birqatar azamattar Premer-Mınıstrdiń jáne respýblıkalyq Kásipodaqtar federasııasynyń Alǵys hatymen, «Kásipodaqtarǵa sińirgen eńbegi úshin» tósbelgisimen marapattaldy.
О́ner juldyzdary tosyn oqıǵa oryn alǵan alǵashqy kúnnen bastap qala turǵyndaryna qoldaý kórsetip keledi. О́tken aptada Arys qalasyndaǵy ortalyq alańda elimizdegi óner juldyzdarynyń qatysýymen «Jasa, jaına Alashymnyń Arysy» atty konsert ótti. Halyqqa mádenı-rýhanı serpilis syılap, merekelik kóńil kúıdi tartý etý maqsatynda uıymdastyrylǵan sharaǵa «Dos-Muqasan» ansambliniń ánshisi, Memlekettik syılyqtyń laýreaty, Arys qalasynyń qurmetti azamaty Aqjol Meıirbekov, halyq ártisi, Arys qalasynyń týmasy Nurjamal Úsenbaeva, kompozıtor-ánshi Nurlan Espanov, Janbolat pen Jazıra, Lázzat Baıyrbekova, Beıbarys Serikbaev, Maqsat Aıtjanov, Álden Jaqsybekov, Farhat Eskeneev syndy Arystan shyqqan sahna sańlaqtary men «Farab» bı ansambli qatysty. Shara aıasynda Arys qalasynyń ákimi Murat Qadyrbek qıyn-qystaý sátte qoldaý berip, kómek qolyn sozǵan barsha qazaqstandyqtarǵa alǵysyn bildirdi. Týǵan jerge kelip, perzenttik paryzyn kórsetken óner maıtalmandaryna oblys ákimi О́mirzaq Shókeevtiń arnaıy Alǵys haty men syı-sııapattary tabystaldy.
Al apta basynda Túrkistan oblysynyń ákimi О́mirzaq Shókeevtiń tóraǵalyq etýimen ótken apparat májilisiniń keńeıtilgen otyrysynda aldymen Arys qalasyndaǵy qurylys barysy men jol, káriz júıeleriniń jańarýy boıynsha atqarylyp jatqan jumystar talqylandy. Sektor jetekshileriniń baıandaýynsha, qaladaǵy qurylys jáne jóndeý jumystary aıaqtalý satysynda tur. Degenmen, qurylys nysandary aýqymdy Nur-Sultan jáne Shymkent qalalary kestede belgilengen merzimnen keshigýde. Elordalyq qurylysshylar mindetine alǵan 1167 páterge kúrdeli jóndeý júrgizilse, 287 páterlik úsh kópqabatty úı jańadan salynýda. Bul aımaqtarǵa qaraıtyn úılerdiń qurylysy men ishki jáne syrtqy árleý jumystary jalǵasýda. Jalpy, oblys ákiminiń málimdeýinshe, Arys qalasynyń ekonomıkalyq-áleýmettik damýy qurylys jumystary aıaqtalǵan soń da qarqyndy jalǵasatyn bolady.