Qazaqstannyń Tuńǵysh Prezıdenti – Elbasy Nursultan Nazarbaev Japonııanyń 126-shy ımperatory Narýhıtonyń taqqa otyrý rásimine qatysýǵa arnalǵan saparynda Tokıo qalasynda birqatar mańyzdy kezdesýler ótkizgeni belgili. Osy oraıda búgin biz Elbasynyń Japonııaǵa arnaǵan bul saparynyń ekijaqty yntymaqtastyqqa tıgizer oń áseri jóninde otandyq sarapshylardyń pikirin usynyp otyrmyz.
Elbasy Nursultan Nazarbaevtyń Japonııaǵa jasaǵan sapary Kúnshyǵys eliniń jańa ımperatorynyń taqqa otyrý rásimine qatysýdan basqa da mańyzdy tájirıbelik mánge ıe boldy.
Álemniń úshinshi ekonomıkasymen ekijaqty qarym-qatynastardy damytý sheńberinde Elbasy uzaq ýaqyt boıy Japonııa Premer-Mınıstri Sındzo Abemen mańyzdy kelissózder júrgizdi.
Kezdesý barysynda eki saıasatker Qazaqstan men Japonııa arasyndaǵy qarym-qatynas- tardyń joǵary mártebesin rastady. Eske sala ketsek, 2016 jyly Nursultan Nazarbaevtyń Japonııaǵa sapary kezinde elder arasyndaǵy baılanys jańa sapaly deńgeıge – «keńeıtilgen strategııalyq seriktestikke» deıin kóterildi.
Búgingi tańda Qazaqstan – Japonııanyń Ortalyq Azııadaǵy eń iri saýda seriktesi. 2018 jyly eki el arasyndaǵy taýar aınalymy 30%-ǵa ósip, 2 mıllıard AQSh dollaryna deıin jetti. Japonııa Qazaqstannyń sheteldik ınvestorlarynyń alǵashqy ondyǵyna kiredi. Japondyq ınvestısııalardyń jalpy aǵyndary 2005 jyldan 2018 jylǵa deıin 5,8 mıllıard AQSh dollaryn qurady.
Sonymen qatar Qazaqstan joǵary tehnologııalar salasyndaǵy álemdik kóshbasshylardyń biri – Japonııamen tehnologııalyq yntymaqtastyqty damytýǵa erekshe nazar aýdarady.
Yntymaqtastyqtyń basym baǵyttary atom energetıkasy, mashına jasaý, telekommýnıkasııalar jáne t.b. salalardy qamtıdy. Jalpy alǵanda, búginde Qazaqstan naryǵynda shamamen 70 japondyq kásiporyn jumys isteıdi.
Japonııa úshin Qazaqstan – Eýrazııanyń dál ortalyǵynda ornalasqan mańyzdy seriktes. Bul rette Japonııa úshin kólik-logıstıkalyq saladaǵy yntymaqtastyqty damytý erekshe qyzyǵýshylyq týdyrady.
Taǵy bir mańyzdy baǵyt – energııa resýrstary, ýran jáne sırek kezdesetin metaldar sııaqty strategııalyq resýrstar salasyndaǵy áriptestikti damytý.
Japonııamen keńeıtilgen qatynastar Qazaqstanda «Shyǵys Azııa» syrtqy saıasat vektorynyń mańyzdy elementi retinde qarastyrylady, eki el de halyqaralyq qatynastardaǵy kóptegen ózekti máseleler boıynsha ortaq pikir- de.
Nursultan Nazarbaevtyń Japonııaǵa jasaǵan kezekti sapary eki el arasyndaǵy yntymaqtastyqtyń zor áleýetin taǵy da rastap, yntymaqtastyqty odan ári keńeıtýge jańa serpin berdi.
Erjan SALTYBAEV,
Qazaqstan Respýblıkasy Tuńǵysh Prezıdenti – Elbasy Qory janyndaǵy ÁESI dırektory