Birikken Arabtar Ámirliginiń (BAÁ) astanasy – Ábý-Dabıde dzıýdodan Grand-Slem jarysy aıaqtaldy. Sońǵy kúni de Qazaqstan quramasyna birde-bir júlde buıyrmady.
Sońǵy kúni bes jerlesimiz jarys kórigin qyzdyrǵan edi. Olardyń da qadamy sátti bolmady. 90 kılo salmaqta kúresken Islam Bozbaev alǵashynda mońǵolııalyq Altynbaǵana Gantýgadan aılasyn asyrǵanymen, ile-shala shvesııalyq Markýs Nımanǵa ese jiberdi.
100 kılo salmaqta qos qandasymyz boz kilemge shyqty. Aıbek Serikbaev grekııalyq Georgıos Malarıaloplýsqa san soqtyrǵanymen, kelesi kezeńde ızraıldik Petr Palchıktiń osal tusyn taba almady. Arman Qalıev tusaýkeser kezdesýinde úndistandyq Avtar Sınghke jol berdi.
+100 kılo salmaq dárejesinde de eki alybymyzǵa úmit arttyq. Ekeýi de el senimin aqtamady. Bastapqy básekesinde Erasyl Qajybaev germanııalyq Iohannes Freıden, al Ǵalymjan Qyryqbaı tájikstandyq Temýr Rahımovtan jeńildi.
Sóıtip, Qazaqstan quramasy Parsy shyǵanaǵy saparynan jalǵyz júldemen oraldy. Esterińizge sala keteıik, jarystyń alǵashqy kúni eń jeńil salmaqta beldesken qazaqstandyq dzıýdoshy Ǵusman Qyrǵyzbaev altyn tuǵyrǵa kóterilgen bolatyn.