S.Toraıǵyrov atyndaǵy oblystyq kitaphanada Jazýshylar odaǵynyń, Jýrnalıster odaǵynyń múshesi, Baıanaýyl aýdanynyń Qurmetti azamaty, aqyn, ardager ustaz Zekebaı Soltanbaıulynyń shyǵarmashylyq keshi ótti. Rýhanı shara barysynda Zekebaı atamyzdyń Máshhúr Júsip týraly jazǵan 5 tomdyq kitabynyń tusaýkeser rásimi uıymdastyryldy.
Kezdesýde oqyrman nazaryna usynylǵan Máshhúr Júsip týraly 5 kitap – «Máshhúr», «Júsip», «Kópeev», «Ǵulama», «Adam» dep atalady. Zekebaı Soltanbaıulynyń buǵan deıin «Jyr jıhazy», Sultanmahmut Toraıǵyrov jaıly «Jalyndy demokrat» atty kitaptary jaryq kórgen-di.
–Men ərkimge ərqıly kórinetin Məshhúr beınesin jasaýda ómir shyndyǵyna súıendim, – deıdi avtor.
–Osydan birneshe jyl buryn Jumabaı Shashtaıulymen birge Baıanaýylǵa jol tústi. Sol saparda Zekebaı Soltanbaıulymen tanystym. Máshhúr Júsip týraly eńbekteri erekshe nazarymdy aýdardy. Áýlıe týraly kitap jazbaq túgili, áýlıeniń jazǵandaryn túsinip oqý úshin de daıyndyq kerek. Al Zekebaı aǵamyzdyń ǵulamaǵa arnalǵan 5 tomdyq shyǵarmasy – qazaq ádebıetiniń oljasy, – dedi keshke arnaıy kelip qatysqan aqyn, «Juldyz» jýrnalynyń bas redaktory Ǵalym Jaılybaı.
Oblystyq Mádenıet jáne tilderdi damytý basqarmasynyń uıymdastyrýymen ótken keshke Z.Soltanbaıulynyń shákirtteri, zııaly qaýym ókilderi, jýrnalıster qatysty.
Jıynda oblys ákimi Bolat Baqaýovtyń quttyqtaý haty oqylyp, aqsaqaldyń ıyǵyna shapan jabylyp, qurmet kórsetildi.
Iá, «Baıanaýyldyń abyzy» atanǵan aqsaqal aýyl-el arasynda erekshe syı-qurmetke, bedelge ıe. О́tkenniń qazynasyn urpaǵyna jetkizý amanat. Muny tereń sezinetin Zekebaı atamyzdyń qalam qýatyna týǵan Baıanaýylynyń sulý tabıǵaty eseleı shabyt qosqandaı.
Búkil týyndylary – ómir boıǵy ishki rýhanı jan tolǵanysynan, izdenýden, kúni-túni oqyp, jazýdan ómirge keldi. Ǵalym Jaılybaı aıtqandaı, týyndylary qalamger retinde qazaq ədebıetine qosylǵan ulttyq qundylyq deýge ábden bolady.
Zekebaı atamyzben suhbattasýdyń ózi bir ǵanıbet!
Selt etkizer túıdek-túıdek oılaryna, qoǵamdyq ómirge ún qosýyna, eshnárseden qalys qalmaıtynyna tańǵalasyń. Osy kúni ol 90 jasty mańaılap qalsa da, qashanda sergek, belsendi.
Zekebaı Soltanbaıuly Baıanaýyldaǵy Egindibulaq orta mektebin uzaq jyldar boıy basqardy. Kóptegen bilimdi, ónerli shákirtter tárbıeledi.
Aqsaqal ustazdyq jolyn ónerin de ilestire, ádebıetpen de syrlasa jalǵastyrdy. Sonaý 70-shi jyldary Zekebaı ata bastaǵan aýdandyq «Baıan sulý» ansambli Almatyǵa konserttik saparmen baryp qaıtady. Aýyl klýby sahnasynda «Eńlik-Kebek», «Qozy Kórpesh-Baıan sulý», «Qyz Jibek» pesalaryn sahnalady.
Osy shyǵarmashylyq kesh barysynda jergilikti ánshiler baıanaýyldyqtar áýenine aınalǵan Zekebaı atanyń «Egindibulaq valsi», «Baıan gúlderi», «Ákeme», «Baýyryma», «Baıan degen…» ánderin shyrqaǵan-dy.
Pavlodar oblysy