Senbi kúni Almatyda ótken kásipqoı boks keshinde jeńiske jetken qazaqtyń gúrzi judyryqty jigitteri ózderiniń Boxrec.com portalyndaǵy reıtıngtegi jaǵdaılaryn edáýir jaqsartty.
Birinshi raýndta-aq ózbekstandyq Muhıtdın Radjapbaevtyń meselin qaıtarǵan Arman Rysbek (78 kılo) birden 325 satyǵa joǵarlap, qazirgi kezde ol óz dıvızıonynda 201 oryndy ıelenýde.
Ýkraınalyq Iаroslav Manýılovty utqan Saparbaı Aıdarov (74 kılo) 526 satydan 356 orynǵa kóterildi. Bul básekede tóreshilerdiń barlyǵy da bizdiń jigittiń jeńgenin biraýyzdan moıyndaǵan edi.
Osyǵan deıin Rýslan Myrsataev (+91 kılo) Boxrec reıtınginde 191 oryndy qanaǵat tutyp keldi. Belarýs eliniń ókili Iýrıı Byhovsevten basym túskennen keıin ol 114 satyǵa jaıǵasty.
Al sol keshtiń basty jekpe-jeginde Namıbııadan kelgen Ýolter Kaýtondokvany upaı sanymen jeńgen qandasymyz Qanat Islam 12 satyǵa joǵarlap, bul kúnderi 12 oryndy ıemdenýde.