Jumys kóleminiń azaıýyna baılanysty qazir «Ersaı» kompanııasynan jumysshylar qysqaryp jatyr. Búgingi tańda Qaraqııa aýdanynyń 400 azamaty jumystan bosady.
Olardy jumysqa ornalastyrý masqatynda 5 qazan kúni Atyraý qalasynda «Teńizshevroıl» JShS merdiger kompanııalarymen kezdesý ótkizilip, jumyssyz azamattardyń tizimi berildi. Qazirgi tańda, 2 mekeme, «Senimdiqurylys» jáne «SSR» kompanııasy jumysqa azamattardy qabyldaýǵa yntasyn bildirýde. Osy kompanııalarmen tıisti jumys atqarylýda, dedi aýdan ákimi Q.Bekov.
Sondaı-aq aýdan basshysynyń aıtýynsha, óńirde kásipkrelerdiń qatary kóbeıýde. «Bastaý bıznes» jobasy boıynsha 61 adam sertıfıkat alyp, 18 adam bıznes ashý boıynsha nesıe alǵan. «Jas kásipker» jobasy boıynsha 52 adam kásipkerlik negizine oqytylyp, 35 adam jobasyn sátti qorǵasa, «Jas projekt» baǵdarlamasy boıynsha aýdanda 33 áleýmettik joba iske asyrylýda. Sonymen qatar, «Teńizshevroıl» JShS qoldaýymen bıylǵy jyly «Jarqyra» jobasyna (Aqtaý, Baýtın, Boranqul kiredi) Quryq aýyly da enip, kúni keshe aýyl turǵyndary úshin túsindirý kezdesýi ótti.
Qaraqııadaǵy taǵy bir jańalyq – sý tazartý qondyrǵysy iske qosylmaq. Jetibaı aýylyndaǵy Edil sýyn tazartý qondyrǵysyna aǵymdaǵy jóndeý jumystary júrgiziledi. Jetibaı aýylyndaǵy qýaty táýligine 3200 m³ sý tazartatyn qondyrǵyǵa aǵymdaǵy jóndeý jumystaryn júrgizý úshin jergilikti bıýdjetten 40,0 mln teńge bólinip, tıisti jumystar júrgizilýde.
Jóndeý jumystary bıylǵy jyldyń qarasha aıynda aıaqtalmaq.