Bıyl Jambyl oblysynyń qurylǵanyna 80 jyl tolyp otyr. Osy ýaqyt aralyǵynda óńirdiń qarqyndy damyp, búgingi deńgeıine kóterilgenine tarıh kýá.
Búgingi tańda oblystyń tarıhı mereıtoıyn laıyqty deńgeıde atap ótý barsha jambyldyqtar úshin úlken jaýapkershilik bolyp tur. Jastardyń boıynda otansúıgishtikti qalyptastyrý maqsatynda qazirde óńirdiń 80 jyldyǵyn rýhanı turǵyda atap ótý qarastyrylýda. Jambyl oblystyq mádenıet, arhıvter jáne qujattama basqarmasynyń basshysy Dúısenaly Byqybaevtyń aıtýynsha, qazirgi kezde óńir mereıtoıyna daıyndyq joǵary deńgeıde.
Búginde Taraz qalasyndaǵy «Balasaǵun» ortalyq konsert zalynyń aldynda Kenen Ázirbaev eskertkishin ashý, óńirden shyqqan óner juldyzdarynyń konsertin uıymdastyrý, áıgili rejısser Asqar Toqpanovtyń eskertkishin ashý, oblystyq qazaq drama teatrynda Bolat Bekjanovtyń «Aısha bıbi» tarıhı dramasynyń qoıylymyn sahnalaý, jańadan ashylatyn kórkemsýret galereıasynda qylqalam sheberleriniń kórmesin ótkizý jáne Yqylas Dúkenuly atyndaǵy qalalyq mádenıet úıiniń janynan juldyzdar alleıasyn ashý kózdelip otyr. Alaıda, qýana quptarlyq dúnıe Jambyl oblysynyń ákimi Asqar Myrzahmetovtyń bastamasymen «Taraz muralary» atty kóptomdyq kitap shyǵarý isi qolǵa alynǵan bolatyn. Al, bıyl oblystyń 80 jyldyǵyna oraı sol kóptomdyqtyń alǵashqy 80 tomyn shyǵarý kózdelýde eken. «Qazirgi tańda oblystyń tarıhy men tarıhı tulǵalarynyń shyǵarmashylyǵyna arnalǵan 80 tom kitaptyń materıaldary ázirlendi. Onyń 21 tomy óńir tarıhyna arnalsa, 59 tomy halyq shyǵarmashylyǵy baǵytynda jaryq kóretin bolady. Jınaqtalǵan materıaldardyń sapasy, mátini, muqabasy, jazylý stıli, sóılemniń qurylýy sarapshylar tobymen tekserilip, 80 tom tolyǵymen «7Su-Company» baspasyna jiberildi. Baspa da óz tarapynan kitap jaryq kórgenge deıingi túzetý jumystaryn júrgizip, búgingi kúnge 29 tom kitap basylyp jatyr», deıdi basqarma basshysy.
Jalpy, Áýlıeata óńirinen Sarbas aqyn, Kenen Ázirbaev, Baýyrjan Momyshuly, Sherhan Murtaza, Ákim Tarazı jáne ózge de kóptegen rýhanı tulǵalar shyqqan. Sonymen qatar shyǵystanýshy ǵalym Ábsattar Derbisáliniń málimdeýinshe, Taraz topyraǵynan talaı ǵulama Tarazıler ótken eken. Osyndaı tarıhı tulǵalardyń muralary da bolashaqta kitap bolyp basylyp, urpaq ıgiligine jaraıdy degen senim bar.