Qazaqstandyq sanavıasııa Birikken Arab Ámirlikteriniń Dýbaı qalasyndaǵy emhanacynan 2 jastaǵy balany elge jetkizdi. Sóıtip bıylǵy 9 aıda sanavıasııa shetelderden 69 azamatymyzdy elge ákelgen.
Jaqynda otandastarymyzdyń biri elimizdiń Syrtqy ister mınıstrligine ótinish jazyp, Dýbaı qalasyndaǵy «Latifa» klınıkasynda jasandy tynys alý apparatymen tynystap jatqan 2 jastaǵy balasyn elge jetkizýge qolǵabys jasaýdy suraǵan. Dálirek aıtqanda, balany sanavıasııa ushaǵy arqyly elge alyp kelýdi ótinipti. Azamattyń ótinishin arnaıy komıssııa qarap, pasıentti ushaqpen tasymaldaýǵa bolatyn-bolmaıtyndyǵy týraly saraptama ázirlengen. Sodan soń Densaýlyq saqtaý mınıstrligi «Ulttyq shuǵyl medısınany úılestirý ortalyǵymen» birlesip balany alyp kelýge sheshim qabyldaǵan. Sóıtip 27 qazanda sanıtarlyq avıasııanyń mobıldi brıgadasy arnaıy ushaq arqyly baldyrǵandy Qazaqstanǵa alyp keldi. Qazir bala Nur-Sultan qalasyndaǵy Ana men bala ulttyq ǵylymı ortalyǵynda emdelip jatyr. Sábı bıyl 15 qazanda Dýbaı qalasyndaǵy basseınderdiń birinen es-tússiz kúıde tabylǵan bolatyn. Sheteldik dárigerler kishkentaı otandasymyzǵa jedel kómek jasaǵan soń júreginiń soǵýy qalpyna kelgen edi. Alaıda pasıenttiń jaǵdaıy tym kúrdeli bolǵandyqtan balanyń esin jıǵyzý múmkin bolmady. Dárigerler onyń 3-dárejeli komaǵa túskenin anyqtaǵan bolatyn. Endi bala em-domyn elimizde jalǵastyratyn boldy.
Bıylǵy 9 aıdyń qorytyndysyna qaraǵanda shetelderde densaýlyǵy syr bergen azamattarymyzdy elge alyp kelý úshin Qazaqstan sanavıasııasy 16 ret saparǵa shyǵypty. Sóıtip sheteldik medısına mekemelerinen 69 azamatty elge jetkizgen. Al sanıtarlyq avıasııa ushaqtary men tikushaqtary jalpy alǵanda bıylǵy jarty jylda 1500-den astam márte kókke kóterilip, 2 myńǵa jýyq pasıentke kómek kórsetti. Sanavıasııa ushaqtary bıylǵy saparlarynda 6 ret donorlyq aǵzalardy tasymaldaǵanyn aıryqsha atap ótýge bolady. Al sanıtarlyq avıasııa qyzmetine júginetin pasıentterdiń kómek shaqyrý sebepterine kelsek, jedel járdemniń 22,9 paıyzy oqys oqıǵalardyń saldarynan densaýlyǵyna zaqym kelgen adamdarǵa járdem kórsetýge arnalypty. Balalar patologııasy boıynsha sanavıasııa shaqyrtýǵa májbúr bolǵandar úlesi – 22 paıyz, qan aınalymy júıesiniń aqaýyna baılanysty – 20,4 paıyz, nárestelerdiń patologııasy – 14,1 paıyz, akýsherlik-gınekologııalyq patologııa boıynsha 12,5 paıyz eken. Al 8,1 paıyz pasıentter ózge jaǵdaılarǵa baılanysty sanavıasııa kómegine júgingen.
Jalpy, otandyq sanavıasııa 2011 jyldan beri 15 myńnan astam reıs jasaǵan. Qazir «Ulttyq shuǵyl medısınany úılestirý ortalyǵynda» sanıtarlyq avıasııanyń 40-qa jýyq ushaǵy men tikushaǵy qyzmet kórsetip júr.