Qazaqstan Qarýly Kúshteriniń Ulttyq áskerı-patrıottyq ortalyǵynda «Jas Sarbaz» jasóspirimder áskerı-patrıottyq qozǵalysy» Respýblıkalyq qoǵamdyq birlestiginiń qataryna resmı túrde qabyldaý rásimi ótti. Bul týraly Qorǵanys mınıstrliginiń baspasóz qyzmeti habarlady.
Is-shara aıasynda «Jas Sarbaz» balalar stýdııasynyń 130 tárbıelenýshisi saltanatty túrde ant qabyldady.
Olar kópshilik aldynda Qazaqstan Respýblıkasynyń Ata zańy men basqa da zańdaryn qatań saqtaýǵa, patrıottyq rýhty bıik qoıyp, Otandy qorǵaýǵa, onyń múddeleriniń erjúrek ári batyl qorǵaýshysy bolýǵa ýáde berdi.
Shákirtterge Qazaqstan Respýblıkasy Qarýly Kúshteri Bas shtaby bastyǵynyń orynbasary general-maıor Muhamedjan Qadyrjanuly Talasov «Jas Sarbaz» uıymynyń tárbıelenýshisi ekendigin rastaıtyn kýálikti tabys etti.
«Sizderdi búgingi «Jas sarbaz» qataryna qosylýymen quttyqtaımyn! Sizderge densaýlyq jáne oqýda tabys tileımin! Bizdiń Otanymyz – Qazaqstan Respýblıkasynyń laıyqty azamattary jáne patrıottary bolyńyzdar! Elbasy aıtqandaı «О́z Otanyndy ystyq súıip, qadir-qasıetin eshqashan túsirme, Qazaqstandy óz júreginde maqtanyshpen alyp júrińder!», dep Muhamedjan Qadyrjanuly shákirtterdi quttyqtady.
Búgingi kúni elimizde 6 198 áskerı-patrıottyq baǵyttaǵy osyndaı synyptar men klýbtar jumys isteıdi. Oǵan 179 224 tárbıelenýshi múshe. Ant qabyldaý rásimi jastardy áskerı-patrıottyq tárbıe berýde jan-jaqty damytýǵa, jobalardy iske asyrýǵa, áskerı-patrıottyq is-sharalarǵa qatysýǵa baǵyttalǵan yntymaqtastyqty ornatýǵa arnalady. Is-sharanyń maqsaty – óskeleń urpaqqa áskerı-patrıottyq tárbıe berý, olarǵa Otanǵa degen súıispenshilik sezimin oıatý.