Soltústik Qazaqstan men Reseıdiń shekaralas aımaqtarynda ornalasqan óńirler arasyndaǵy ekonomıkalyq, mádenı, rýhanı yntymaqtastyqty damytý baǵdarlamalaryna oraı is-sharalar júıeli túrde atqarylyp keledi.
«Aralaspasa, aǵaıyn da jat» dep tekke aıtylmasa kerek. Onyń ústine kórshi elde turyp jatqan aǵaıyndarymyzdyń qatary kóp ekenin eskersek, mundaı baılanystardyń mańyzy ólsheýsiz ekeni aıtpasa da túsinikti. Jýyrda Qorǵan oblysyna qarasty Makýshın aýdanynda alǵashqy qazaq synyby ashylǵanda taǵdyryn osy óńirmen baılanystyrǵan 12 myńǵa jýyq qandasymyzdyń qýanyshynda shek bolmaǵan. Qorǵan oblysy ulttyq-mádenı avtonomııasynyń tóraǵasy Qaırat Oralovtyń bastamasymen shańyraq kótergen qazaq synybynyń ashylý saltanatyna Qyzyljar óńirinen arnaıy delegasııa qatysyp, ǵylymı-ádistemelik oqýlyqtar men kitaptar syıǵa tartqan. Munda M. Qozybaev atyndaǵy SQMÝ janyndaǵy kolledjdi bitirgen jas maman Altynaı Bekesheva ustazdyq etedi.
Endi, mine, osy jańalyqtyń izi sýymaı jatyp Túmen tórinen jyl qusyndaı saǵyndyrǵan taǵy bir qýanyshty habar jetti. Eki myńdaı qazaq turatyn Ýporovo selosynda qazaq synybynyń tusaýy kesildi. Aýdan ákimshiliginiń basshysy Leonıd Saýkov balalardyń ana tilinde alańsyz bilim alýyna barlyq múmkindiktiń týdyrylatynyn aıta kelip, ádistemelik oqý ádebıetterin satyp alýǵa arnaıy sertıfıkatty tabys etti. Esenǵalı Ibraev jetekshilik etetin qazaq avtonomııasy ortalyǵy da qarjylaı qoldaý kórsetti.
– Qazir 25 oqýshy dáris alady. Yntalary jaqsy. Tek 1989 jyly jaryq kórgen oqýlyqtardy paıdalanyp júrmiz. Qazaqstan jaǵynan praktıkalyq kómekter kórsetilse, quba-qup bolar edi, – deıdi bastaýysh synyp muǵalimi Meıramgúl Aıtqojınova.
20 myńnan astam qandasymyz mekendeıtin oblystyń Golyshmanov aýdanynda taǵy bir qazaq synybyn ashý josparlanǵan.
Soltústik Qazaqstan oblysy