Báıten Omarov atyndaǵy «Jas sahna» teatry shymyldyǵyn «Jámılá» premerasymen ashty. Jańa maýsymdaǵy bul týyndy – teatr repertýaryndaǵy alǵashqy qazaq tilindegi qoıylym. Izdenimpaz jastardan quralǵan teatr qoıylym úshin Qyrǵyz elinen rejısser Ulanmyrza Qarypbaevty arnaıy shaqyrǵan. Tusaýkeserge jazýshynyń uly Eldar Aıtmatov keldi. Rejısser men akterlik quram Shyńǵys Aıtmatovtyń «Jámıla» povesin tańdapty, dep habarlady Almaty qalasy ákimdiginiń baspasóz qyzmeti.
Kóptegen tilderge aýdarylǵan shyǵarmada tek soǵys zardaby nemese áıel taǵdyry jaıly emes, odan tereń, úlken mahabbat oqıǵasy baıandalady. Qyrǵyzstannnan arnaıy shaqyrtylǵan dańqty jazýshynyń uly ákesiniń jany qazaq elimen birge bolǵanyn aıtty. «Ákem Qazaqstandy óz elim dep esepteıtin. Ol úshin eki el arasynda shekara bolmaǵan. Balalyq shaǵy ótken Sheker aýyly Qazaqstanǵa jaqyn ornalasqandyqtan únemi osy elmen tyǵyz baılanysta boldy. Osy eldiń salt-dástúrin jaqsy bildi. Bul «Jámıla» povesti ákemniń alǵashqy jazǵan týyndylarynyń biri bolsa da, óte tanymal edi», deıdi Shyńǵys Aıtmatovtyń uly Eldar Aıtmatov.
«Jámıla» - jas teatrdyń kórermenge qazaq tilinde usynǵan alǵashqy qoıylymy. Kórermender avtordyń mahabbatty bıik qoıǵanyn, qoıylym rejısseri de shynaıy kórsete bilgenin atap ótti.