Qıynshylyq qyspaǵy
Tórt balanyń oqý quralyn tolyqtaý jalǵyz basty ana úshin ońaıǵa túspedi. Jarǵaq qulaǵy jastyqqa tımeı, qansha tıtyqtasa da búgin tapqany búginnen aspady. Aqyry jomart baıdan qaryz alyp, balalaryn mektepke ornalastyryp bolǵanyna máz. Al óz jaǵdaıyn oılaǵanda qýanysh qusy qonaqtaǵan kóńili sý sepkendeı basylady. Onymen qoımaı kedeı kezeńnen tosyp, oıpańnan tonaıtyn qyrsyqty jomart baı da bergenine eki kún bolmaı jatyp, aqshasyn surap, janyn alardaı óńmeńdeıdi.
Boıymdy bılegen qorqynysh
Súrkeıli kún, sýyq yzǵar, men óz basymdaǵy qaıǵymmen jan alasapyran keńistiginde júrmin. Arqa súıer aıaýly anashymsyz ómirdiń keregi ne dep óz-ózimdi quzdan qulatqandaı talyqsyp baryp shala baýyzdalǵan qoıdaı eseńgireımin. Jasy egdeleý tartqan bir beıtanys ana ólemektiń artynan ólmek joq, myqty bol, ornyńnan tur, - dep qolymnan tartqyshtap jatyr. Men aıqasqan kirpikterimdi áreń ashyp qarasam, qarsy aldymda anam: - Qyzym, tursańshy endi, kún kók jıekten kóterilgeli qashan?! Tańǵy asyńdy ish, - degende ter basqan júzimdegi jas shyqqan kózimdi de súrtýge úlgirmeı anamdy bas salyp qushaqtaǵan beti turyp qaldym.
Ázilbek Gúlden