Qazaqstanda ekstrakorporaldyq uryqtandyrýdyń bıýdjettik baǵdarlamasy 2010 jyly engizilgen. Sodan beri elimizde memleket járdemine súıengen ata-analar bul tásil arqyly 2 myń 700-den astam sábıdi dúnıege ákeldi. Bul jaıly Almatyda ótken «Bedeýlikti emdeýdiń zamanaýı tásilderi. QRT: búgini men bolashaǵy» atty halyqaralyq ǵylymı-tájirıbelik konferensııada Densaýlyq saqtaý mınıstri Eljan Birtanov aıtty.
18 memlekettiń ǵalymdardy qatysqan basqosýda mınıstr memleket 2010 jyldan bastap EKU baǵdarlamasyn tegin medısınalyq kómektik kepildik berilgen kólemine engizilgenin, sóıtip sońǵy segiz jylda memleket EKU sıklderiniń sanyn 9 esege ósirgenin aıtty. Buryn jylyna 100 EKU memleket esebinen júrgizilse, búginde onyń mólsheri 900-ge jetipti. Máselen, 2010 jyly 100 EKU sıkli, 2011 jyly 350, 2012-2014 jyldary 600, 2015 jyly 820, 2016 jyly 816 sıkl jasalǵan. 2017 jyldan beri jyl saıyn 900 EKU sıklin memleket qarjylandyryp keledi. «Bedeýlikke shaldyqqan qazaqstandyq otbasylardy memlekettik qoldaý maqsatynda zamanaýı qosalqy reprodýktıvti tehnologııa arqyly 5,5 myńnan astam prosedýra jasaldy. Tek 2010-2018 jyldary Qazaqstanda bıýdjettik baǵdarlamanyń arqasynda 2700-den astam bala dúnıege keldi», dedi mınıstr E. Birtanov.
Búginde elimizde EKU baǵdarlamasy boıynsha úlken tájirıbesi bar 1 memlekettik jáne 5 jekemenshik klınıka jumys isteýde. Elimizde EKU kómegimen alǵashqy bala 1996 jyly dúnıege keldi.