Aqtóbe aımaǵynda qazan aıynyń sońyna deıin bir qalypta turǵan aýa raıy qarashanyń basynda nildeı buzyldy. Oblys ortalyǵynan shalǵaı ornalasqan Yrǵyz aýdany aýmaǵyn, Samara – Shymkent halyqaralyq jol dáliziniń tusynda qonys tepken Qalybaı aýylynyń mańyn uzaq ýaqyt japalaqtap jaýǵan qalyń qar basyp qaldy.
Sonyń saldarynan bul kezde aýa raıynyń kúrt ózgerýi jol ústindegi 200 avtomobıldiń qozǵalysyn tejedi. Qar tutqynyna 125 júk mashınasy men 70 jeńil kólik jáne salonynda 15 jolaýshysy bar «Tashkent – Túmen» reıstik avtobýsy tap boldy.
Adamdardy qutqarýǵa 15 avtopatrýl quramy jumyldyryldy. Sonyń ishinde Yrǵyz ben Áıteke bı aýdandarynyń polıseıleri men TJD qyzmetkerleri jáne «Qazavtojol» JShS ókilderi der ýaqytynda qımyldaı bildi. Qosymsha kómekke muqtaj bolǵan 30 adamǵa shuǵyl kómek berildi. О́zge jolaýshylar jol boıyndaǵy servıstik oryndar men tamaqtandyrý qosyndaryna ornalastyryldy. Mundaı kúrdeli jaǵdaıdyń qalyptasýy kóptegen kólik ıeleriniń qysqy kezeńge ázirlenbeýi, soǵan sáıkes avtomobılderiniń dóńgelekterin aýystyrmaǵany sebep bolypty.
Sóıtip qutqarýshylar qar keptelisinen 190 avtomobıldi súırep alyp shyqty. Kempıngterde barlyq jolaýshylar men júrgizýshilerge tegin tamaq uıymdastyryldy. Sonymen birge oqıǵa ornynda qalǵan keıbir adamdarǵa tamaq tasylyp berildi. О́kinishke qaraı, reıstik avtobýstaǵy jolaýshylardyń biri, Tájikstan azamaty Túmende atqaryp júrgen jumysynan eline qaıtyp kele jatqan saparynda qaıtys boldy. Marqumnyń ólimi jol ústindegi oqıǵadan emes, aǵzasynda burynnan bar dertten, ıaǵnı júrek ıshemııasy talmasynan bolǵan eken. Dárigerlik saraptama qorytyndysy osyndaı. Onyń máıitin patrýldik qyzmetkerler «Qarabutaq trassalyq medısınalyq qutqarý beketine» jetkizdi. Ári qaraı onyń denesin Tájikstanǵa jetkizý joldary uıymdastyrylady.
Dúısenbi kúni Qalybaı aýyly mańaıynda qar tutqynynda qalǵan avtomobılder tolyq shyǵaryldy. Mundaı jaǵdaı Shalqar men Yrǵyzdyń ortasynda da oryn alǵan. Munda bes avtokólik tabıǵattyń kúrt qubylysynan kózdegen jerine jete almaı bógelgen. Qutqarýshylardyń kómegimen atalǵan kólikter Yrǵyzǵa jetkizildi. Sondaı-aq Shalqar men Taldyqum arasynda jeti jolaýshysy bar «ÝAZ» avtokóligi de turyp qalǵan. Bul jónindegi habar qutqarýshylarǵa keshirek tıse de oqıǵanyń sońy nátıjeli aıaqtaldy. Oqys oqıǵadan eshkim zardap shekpegen.
Aqtóbe oblysy