Prezıdent Q.Toqaevtyń Qazaqstan halqyna arnaǵan Joldaýynda kóterilgen máselelerdiń birqatary bilim berý júıesindegi ózgerister týraly messedjderiniń jalǵasy boldy. Prezıdent basty máseleler retinde qalalyq jáne aýyldyq mektepter arasyndaǵy orta bilim sapasyndaǵy alshaqtyqty, oqýlyqtar sapasynyń jetkiliksizdigin, eldiń joǵary oqý oryndarynyń talapqa sáıkes kelmeıtin deńgeıin atady.
Ádette, bul máselelerdi sheshý qarjylandyrý kólemine tikeleı baılanysty. Qazirgi ýaqytta aımaqtardaǵy bilim berý uıymdaryn basqarý júıesi tıimdi emes, aýdandyq deńgeıde bıýdjettik ákimshilendirý barlyq týyndaǵan máselelerdi tez ári tolyq sheshýge múmkindik bermeıdi. Bul mektepterdi jóndeý, jylýmen qamtamasyz etý, ınternet jáne basqa da máselelerge qatysty. Sondyqtan Prezıdent bilim berýdi ár deńgeıinde qarjylandyrýdy qarastyrý mindetin qoıdy.
Aýyldyq jerlerdegi bilim berý isi – eldegi sapaly adam kapıtalyn qalyptastyrý úshin eń mańyzdy sátterdiń biri ekenin atap ótken jón. Kúrdeli máseleler tiziminde aýyldarda muǵalimderdiń jetispeýshiliginen jıi týyndaıtyn qıyndyqtar bar. Joldaý aıasynda aýyldaǵy bilikti pedagogtardyń tapshylyǵy máselesin sheshý úshin «Dıplommen – aýylǵa!» baǵdarlamasynyń jumys aıasyn keńeıtý jáne osy baǵdarlamany qarjylandyrýdy 20 mlrd teńgege deıin jetkizý usynyldy.
Halyqtyń áleýmettik osal toptaryn qoldaýdyń óte sátti mysaly – az qamtylǵan jáne kóp balaly otbasylardan shyqqan daryndy balalardy qoldaý jónindegi Jol kartasyn jasaý. Osyndaı balalarǵa úıirmelerge, bilim berý ortalyqtaryna, jazǵy lagerlerge barýǵa múmkindik beriledi. Sonymen qatar Prezıdent az qamtylǵan balalar qataryna kiretin barlyq oqýshylar úshin turaqty negizde kepildendirilgen áleýmettik kómekti engizý qajet ekenin atap ótti. Bul áleýmettik kómekke tegin ystyq tamaq, oqý quraldarymen jáne mektep formasymen qamtamasyz etý kiredi.
Sondaı-aq sapaly bilim berý júıesi ǵylymnyń damýynsyz múmkin emes. Qazaqstandyq ǵylymnyń ozyq damýyna nazar turaqty jáne keshendi bolýy tıis. Prezıdent Q.Toqaev Joldaýda atap ótkendeı, «Bizdiń ǵylym qanshalyqty sapaly jáne tıimdi? Úkimet bul máseleni ǵylymı zertteýlerdiń deńgeıin arttyrý jáne olardy is júzinde qoldaný turǵysynan qarastyrǵany jón». Osyǵan baılanysty otandyq ǵylymdy qoldaýdyń naqty tetikterin ázirleý konteksinde Memleket basshysynyń messedjin keńeıtý jáne jalǵastyrý mańyzdy.
Mádına NURǴALIEVA,
Prezıdent janyndaǵy Qazaqstan strategııalyq zertteýler ınstıtýty dırektorynyń keńesshisi