Elbasy Nursultan Nazarbaev MAGATE-niń burynǵy Bas dırektory, Nobel syılyǵynyń laýreaty Mohammed Ál-Baradeımen jáne Jahandyq qaýipsizdik ınstıtýtynyń prezıdenti Djonatan Granoffpen kezdesti, dep habarlady Tuńǵysh Prezıdent – Elbasynyń baspasóz qyzmeti.
Kezdesý barysynda Nursultan Nazarbaev «Astana klýbynyń» otyrysyna qatysqany úshin Mohammed Ál-Baradeı men Djonatan Granoffqa alǵys bildirdi.
– Mohammed Ál-Baradeı MAGATE-ny ıadrolyq qarýdy taratpaýǵa jaýapty negizgi organǵa aınaldyrdy. Biz Sizben birge Qazaqstanda tómen baıytylǵan ýran bankin qurýdy bastadyq. Bul óte mańyzdy oqıǵa boldy. Bizdiń elimizge az baıytylǵan ýrannyń alǵashqy partııasy keldi, – dedi Qazaqstannyń Tuńǵysh Prezıdenti.
Sondaı-aq Elbasy Jahandyq qaýipsizdik ınstıtýtynyń ıadrolyq qarýdy taratpaýdaǵy mańyzdy rólin atap ótti.
– Qazaqstannyń ıadrolyq qarýsyzdaný máselesindegi rólin jaqsy bilesizder. Biz ıadrolyq qaýipsizdikti qamtamasyz etýge baǵyttalǵan barlyq máselelerge belsendi qatysyp júrmiz, – dedi Nursultan Nazarbaev.
О́z kezeginde MAGATE-niń burynǵy Bas dırektory Qazaqstan ıadrolyq qarýsyz álem qurý ıdeıasyn qoldaıtyndyǵyn is júzinde dáleldegenin aıtty.
– Siz ıadrolyq qarýsyzdaný salasyndaǵy jetekshi rólińizdi dáleldedińiz. Qazaqstan óz sózin naqty is-árekettermen rastady, ıadrolyq áleýetten bas tartty, Semeı polıgonyn japty. Endi Sizdiń kúsh-jigerińizdi ǵalamdyq jáne jergilikti deńgeıdegi máselege baǵyttaý múmkindigi mańyzdy bolyp otyr, – dedi Mohammed Ál-Baradeı.
О́z kezeginde Ǵalamdyq qaýipsizdik ınstıtýtynyń prezıdenti Qazaqstannyń Tuńǵysh Prezıdentiniń jappaı qyryp-joıý qarýyn taratýǵa qarsy is-qımylyn joǵary baǵalady.