Konstıtýsııalyq reforma jónindegi komıssııanyń 12-shi otyrysynda jańa Ata zań jobasyna engizilgen qosymsha normalar tanystyryldy. Bul týraly Konstıtýsııalyq sot tóraǵasynyń orynbasary Baqyt Nurmuhanov aıtty, dep jazady Egemen.kz.
Negizgi basymdyqtardyń biri turǵyn úıge qol suǵylmaýshylyq kepildigin kúsheıtýge arnaldy. Baqyt Nurmuhanovtyń aıtýynsha, Konstıtýsııanyń 28-babynyń 1-tarmaǵyna engizilgen tolyqtyrýlar tek turǵyn úıden aıyrýǵa ǵana emes, sot sheshiminsiz turǵyn úıden shyǵarýǵa da tyıym salýdy kózdeıdi. Sonymen qatar turǵyn úıge basyp kirý, ony qarap-tekserý nemese tintý tek zańda belgilengen jaǵdaıda jáne kózdelgen tártippen ǵana múmkin bolady.
Serik Egizbaev: Jańa Konstıtýsııa qoǵam suranysyna jaýap beredi
Otyrysta jańa Konstıtýsııanyń kúshine ený merzimderi men 1995 jylǵy Konstıtýsııanyń qoldanysyn toqtatý tártibin aıqyndaıtyn normalar da qosymsha qarastyrylǵany aıtyldy. Sondaı-aq birqatar erejeler bir palataly Quryltaıǵa kóshý jáne ony saılaý máselelerin retteýge baǵyttalǵan. Spıkerdiń sózinshe, normalardyń taǵy bir bóligi laýazymdy tulǵalardy taǵaıyndaý tártibi men jańa memlekettik organdardy qalyptastyrýǵa qatysty.
«Konstıtýsııalyq Keńes pen Konstıtýsııalyq Sottyń buryn qabyldanǵan normatıvtik qaýlylary Ata zańǵa qaıshy kelmeıtin bóliginde zańdy kúshin saqtaıtynyn atap ótkim keledi», dedi Baqyt Nurmuhanov.
Jańa Konstıtýsııada ótpeli kezeńniń barlyq rásimderi naqty jazylady
Sóz sońynda ol Konstıtýsııa jobasynyń mátinderi muqııat pysyqtalǵanyn jetkizdi.
«Memlekettik jáne orys tilderindegi mátinder barynsha jetildirildi. Termınologııalyq jáne semantıkalyq birizdilik qamtamasyz etildi. Quqyqtyq normalar qoljetimdi, mazmuny barshaǵa túsinikti etip jazylǵan. Bul baǵytta zańgerler men lıngvıst mamandardan quralǵan jumys toptary aýqymdy jumys atqardy. Jańa Konstıtýsııanyń pysyqtalǵan jobasy Komıssııa men jumys toptarynyń otyrystarynda jan-jaqty talqylanyp, qoldaý tapty. Komıssııa músheleriniń azamattarmen jáne zań qoǵamdastyǵy ókilderimen ótkizgen kezdesýlerinde de oń pikirler aıtyldy», dep túıindedi ol.
Assambleıa jastary jańa Konstıtýsııa jobasyna qoldaý bildirdi