Qazaqstan men Belgııa ekonomıkalyq dıplomatııaǵa basa nazar aýdaryp, saıası saladaǵy jan-jaqty yntymaqtastyqty jáne halyqaralyq platformalardaǵy ózara is-áreketterdi kúsheıtýge nıetin bildirdi. Bul Qazaqstan-Belgııa saıası konsýltasııalardyń negizgi úndeýi boldy.
Qazaqstan delegasııasyn Syrtqy ister mınıstriniń orynbasary Roman Vasılenko, al Belgııa delegasııasyn Syrtqy ister mınıstrligi Ekijaqty yntymaqtastyq dıreksııasynyń bas dırektory Anık Van Kalster basqardy.
Dıplomattar saıası, ekonomıkalyq, mádenı jáne gýmanıtarlyq yntymaqtastyqtyń keńaýqymdy máselelerin, sondaı-aq halyqaralyq kún tártibin jan-jaqty talqylady.
Atap aıtqanda, qazirgi zamanǵy jahandyq syn-tegeýrinderdi eńserýdiń joldaryn talqylaı otyryp, R. Vasılenko Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń jahandyq deńgeıde, Eýrazııa jáne halyqaralyq ekonomıkalyq uıymdar deńgeıinde «Úsh dıalogty» qurý bastamasy týraly aıtty.
Sondaı-aq qazaqstandyq dıplomat suhbattasýshyny elimizde zańnyń ústemdigin qamtamasyz etýge baǵyttalǵan ınstıtýsıonaldyq reformalardy júzege asyrý barysy týraly, Memleket basshysynyń «Konstrýktıvti qoǵamdyq dıalog – Qazaqstannyń turaqtylyǵy men gúldenýiniń negizi» atty joldaýynyń negizgi basymdyqtary men baǵyttary,«Nurly jol» baǵdarlamasyn júzege asyrý, júrgizilip jatqan áleýmettik-ekonomıkalyq reformalar jáne Qazaqstannyń sot júıesi men quqyq qorǵaý organdaryn reformalaý týraly habardar etti.
О́z kezeginde, A. Van Kalster 2017 jyly shildede Nur-Sultanǵa jasaǵan sońǵy saparynan bastap Qazaqstan-Belgııa qatynastarynyń barlyq baǵyttardaǵy damýynyń oń úrdisin qanaǵattanǵandyqpen atap ótti. Sonyń ishinde, 2018 jylǵy qazanda Qazaqstannyń Tuńǵysh Prezıdenti - Elbasy N. Nazarbaevtyń Belgııalyqtardyń Koroli Fılıppen ótken kezdesýi ekijaqty áriptestikke jańa serpin berdi.
Ekonomıkalyq dıplomatııa sheńberinde taraptar ósimniń oń dınamıkasyn rastady jáne energetıka, aýyl sharýashylyǵy, medısınalyq qaldyqtardy óńdeý jáne ózge salalardaǵy tabysty ózara árekettesýdi atap ótti. Qazaqstanda «John Cockerill», «Carmeuse», «Orfit» sııaqty jáne basqa belgııalyq kompanııalarmen birlesken jobalar iske qosyldy. Belgııa Qazaqstan ekonomıkasyndaǵy eń iri ınvestorlardyń biri bolyp tabylady – Belgııa kompanııalary Qazaqstanǵa 7 mlrd. AQSh doll. astam tikeleı ınvestısııa saldy. A. Van Kalster Vallonııanyń eksportqa jáne sheteldik ınvestısııalarǵa yqpaldasý «AWEX» agenttiginiń jáne Flandrııanyń Investısııalardy tartý jáne eksportqa yqpaldasý «FIT» agenttiginiń basshylyǵymen Belgııa kásiporyndarynyń Qazaqstanǵa eki jylda bir ret uıymdastyrylatyn iskerlik mıssııanyń tıimdiligin erekshe atap ótti. Qazaqstanǵa jasaǵan ekonomıkalyq saparlardyń sátti tájirıbesin eskere otyryp, Belgııa tarapy osyndaı mıssııalardy jyl saıyn ótkizý máselesin qarastyrýda.
Qazaqstannyń ınvestısııalyq ahýalyn talqylaı otyryp, R. Vasılenko Premer-Mınıstrdiń tóraǵalyǵymen ótetin úılestirý keńesi, sheteldik ınvestısııalardy tartý men qoldaýdyń úsh deńgeıli júıesi, «KazakhInvest» qyzmeti týraly aıtty. Qazaqstan delegasııasy «Astana» Halyqaralyq qarjy ortalyǵynyń negizinde iskerlik baılanystardy damytý perspektıvalaryna erekshe nazar aýdardy.
Sonymen qatar, ustanymdardy úılestirý jáne qazirgi zamannyń ózekti máselelerin sheshý úshin halyqaralyq jáne aımaqtyq uıymdar sheńberindegi ózara is-árekettiń máseleleri qarastyryldy. A.Van Kalster Qazaqstannyń BUU Qaýipsizdik Keńesiniń 2017-2018 jyldardaǵy turaqty emes múshesi retindegi mańyzdy rólin, Qazaqstannyń halyqaralyq qaýipsizdikke qosqan úlesin atap ótti. 2019 jyldyń 1 qańtarynda Belgııa BUU Qaýipsizdik Keńesiniń turaqty emes múshesi retindegi mıssııasyna kiristi jáne 2020 jylǵy aqpanda Keńestiń tóraǵalyǵyna daıyndalýda.
Eýropalyq Odaqpen yntymaqtastyq aıasynda taraptar Keńeıtilgen seriktestik pen yntymaqtastyq týraly kelisimniń kúshine enýiniń jáne 2019 jyldyń maýsym aıynda qabyldanǵan Eýropalyq Odaqtyń Ortalyq Azııa boıynsha jańa strategııasyn is júzinde iske asyrýdyń mańyzdylyǵyn atap ótti.
Kezdesý barysynda Aýǵanstandy qalpyna keltirýge járdemdesý salasyndaǵy yntymaqtastyq týraly jan-jaqty pikir almasý boldy. Belgııa tarapy Qazaqstannyń Aýǵanstanǵa gýmanıtarlyq, tehnıkalyq jáne bilim berý kómegin kórsetý arqyly jasaǵan kúsh-jigerin jáne úlesin joǵary baǵalady. R. Vasılenko óz áriptesterin Qazaqstannyń Aýǵanstandaǵy beıbitshilik pen qaýipsizdikti qalpyna keltirý jónindegi bastamalary týraly, sondaı-aq aýǵan qyzdaryna Qazaqstan men О́zbekstanda bilim berý baǵdarlamasynyń iske qosylýy týraly habarlady. Atalǵan baǵdarlamanyń ınaýgýrasııa rásimi osy kúni Brıýsselde ótti.
Halyqaralyq qaýipsizdik máseleleri boıynsha yntymaqtastyq taqyryby Belgııa tarapyn erekshe qyzyqtyrdy. Qazaqstandyq dıplomat Qazaqstan azamattaryn Sırııa men Iraktyń jaýyngerlik is-qımyldar aımaqtarynan qaıtarý boıynsha «Jýsan» operasııasy týraly jan-jaqty aıtyp berdi. Taraptar Qazaqstan men Belgııanyń tıisti qyzmetteri arasynda tájirıbe almasýǵa nıet bildirdi.
Kezdesý qorytyndylary boıynsha taraptar Qazaqstan-Belgııa qatynastaryn barlyq salada odan ári sapaly damytý jáne keńeıtý úshin birlesken kúsh-jigerlerdi jumsaýǵa daıyn ekenin rastady.