Monakoda ótken Halyqaralyq jeńil atletıka federasııasynyń (IAAF) otyrysynda qazaqstandyq sportshy Olga Rypakova sol uıymnyń komıssııa múshesi bolyp saılandy.
Aıtýly sportshynyń qandaı da qurmetke laıyq ekeni daýsyz. 30 qarashada 33 jasqa tolǵaly otyrǵan Olga Sergeıqyzy úsh qarǵyp sekirý jattyǵýy boıynsha Olımpııa oıyndarynda úsh márte jeńis tuǵyryna kóterildi. Atap aıtsaq, 2008 jyly Beıjińde – kúmis, 2012 jyly Londonda – altyn, 2016 jyly Rıo-de-Janeıroda – qola medaldi moınyna ildi. Álem chempıonatynda bir kúmis pen qos qolany oljalady. Jabyq ǵımaratta ótken dúnıejúzilik dodada altynnan alqa taǵynyp, taǵy eki márte júldegerler sanatyna qosyldy. Azııa oıyndarynda tórt ret teńdessiz dep tanyldy. Onyń basqa da tolyp jatqan ataqtary taǵy bar.
Dańqty otandasymyzdyń el sportyna sińirgen eńbegi memleket tarapynan da joǵary baǵalanyp, ol «Parasat», ekinshi dárejeli «Barys» jáne «Qurmet» ordenderimen marapattaldy. Mine, endi Olga Rypakova quramyna 2012 memlekettiń ulttyq federasııalary engen beldi uıymnyń múshesi bolyp otyr.