Bir aptanyń ishinde keńes músheleri qalanyń áleýmettik nysandary men balalar mekemelerin aralap, tekserdi.
Almaty qalasy ákiminiń orynbasary Erjan Babaqumarov Nur Otan partııasy janyndaǵy Otbasy isi, balalardyń quqyqtaryn qorǵaý jónindegi respýblıkalyq keńes múshelerimen kezdesti. Basqosýda kóp balaly jáne áleýmettik jaǵynan az qamtylǵan otbasylardaǵy balalardy qoldaý jáne áleýmettik qorǵaý, bilim berý, densaýlyq saqtaý, sport salalarynda qabyldanyp jatqan máselelerdi talqylady dep habarlaıdy Almaty qalasy ákimdigi baspasóz bólimi.
Bir aptanyń ishinde keńes músheleri qalanyń áleýmettik nysandary men balalar mekemelerin aralap, tekserdi. Munda balalardyń kúndelikti ómirine qajetti barlyq aspektiler – bilim alýdan bastap, tamaqtaný sapasy, tipti, bos ýaqyttyń uıymdastyrylyna deıin nazar aýdaryldy. Jumys qorytyndysy boıynsha, Almaty qalasy ákiminiń orynbasary E. Babaqumarovpen ótken kezdesýde Almaty ákimdigine balalardy qoldaý boıynsha qalada júrgizilip jatqan jumystardyń sapasyn arttyrý úshin qajetti usynystar berildi.
Nur Otan partııasy janyndaǵy Otbasy isteri, balalardyń quqyqtaryn qorǵaý jónindegi respýblıkalyq keńes tóraǵasynyń orynbasary Dınara Zakıevanyń aıtýynsha, jumys toby áleýmettik qorǵaý, bilim berý, densaýlyq saqtaý salasyndaǵy 150-den astam nysandy aralap, otbasylarmen kezdesip, sheshimin tabatyn birqatar ózekti máseleni anyqtaǵan.
Kezdesýde sondaı-aq Nur Otan partııasy janyndaǵy Otbasy isi, balalardyń quqyqtaryn qorǵaý jónindegi respýblıkalyq keńestiń múshesi Rysty Jumabekova, Balalardyń quqyqtaryn qorǵaý jónindegi keńestiń keńesshisi Mansııa Iskazına, IIM ıývenaldyq polısııanyń aǵa ınspektory Rústem Quttybaev sóz sóıledi.
Jıynǵa qalalyq Áleýmettik ál-aýqat, Bilim, Qoǵamdyq densaýlyq, Sport, Mádenıet, Qoǵamdyq damý basqarmalarynyń jáne jergilikti polısııa qyzmetiniń basshylary, aýdan ákimderiniń áleýmettik máseleler jónindegi orynbasarlary, aýdandyq basqarma bólimderiniń basshylary qatysty.
Kezdesýdiń sońynda qala ákiminiń orynbasary Erjan Babaqumarov qalalyq basqarma basshylary men aýdan ákimderiniń orynbasarlaryna kóterilgen máselelerdi respýblıkalyq keńespen sheshý jóninde birqatar tapsyrma berdi.