Qoǵamda búginde mal urlyǵy, sonymen qatar adamdardy eńbekke zańsyz jegý sııaqty máseleler óte ózekti. Sondyqtan Jambyl oblystyq Polısııa departamenti mal urlyǵynyń aldyn alý jáne jedel jaǵdaıdy jaqsartý maqsatynda óńir boıynsha «Qashar» is-sharasyn uıymdastyrdy.
Is-shara barysynda oblys aýmaǵyndaǵy 731 mal sharýashylyǵy qaralǵan bolatyn. Departamenttiń málimeti boıynsha, jedel aldyn alý sharasynyń nátıjesinde mal sharýashylyqtaryna qarasty 19 adamnyń turaqty turǵylyqty jeriniń joq ekeni anyqtalǵan. Al, tekserilgen 1000-ǵa jýyq qarý ıeleriniń 63-i qarý saqtaý erejelerin buzǵany úshin jaýapqa tartylyp, 49 atys qarýy tárkilengen. Sonymen qatar belgi salynbaǵan 39 bas mal anyqtalyp, urlanǵan 100 bas mal tabyldy. Sondaı-aq «Qashar» is-sharasy kezinde polısııa qyzmetkerleri izdeýde júrgen eki qylmyskerdi ustady.
Sonymen qatar Qazaqstan Respýblıkasynyń Kóshi-qon zańnamasyn buzýdy anyqtaý úshin de Jambyl oblysynyń aýmaǵynda uıymdastyrylǵan «Qashar» jedel profılaktıkalyq is-sharasy óz nátıjesin berdi. Oǵan Jambyl oblystyq Polısııa departamenti Kóshi-qon qyzmeti basqarmasy qyzmetkerleriniń jeke quramy qatysty. Jambyl oblysynyń Baızaq aýdany, Tegistik aýylynda jeke sharýashylyqty tekserý barysynda zańsyz Kóshi-qonǵa qarsy kúres jónindegi arnaıy jeke rota qyzmetkerleri zańsyz eńbek qyzmetimen aınalysatyn О́zbekstan Respýblıkasynyń tórt azamatyn anyqtady. Qazirgi tańda sheteldik azamattarǵa qatysty Qazaqstan Respýblıkasynyń Ákimshilik-quqyqbuzýshylyq Kodeksiniń 517-baby boıynsha ákimshilik hattama toltyrylyp, olardy el aýmaǵynan shyǵaryp jiberý máselesi sheshilýde.