О́tken senbide Jeńis alańynda №5517 áskerı bóliminiń bıyl jazda ásker qataryna shaqyrylǵan jas sarbazdary saltanatty túrde elin, Otanyn qorǵaýǵa ant qabyldady. Osy saltanatty rásimge bólim basshylyǵynyń arnaıy shaqyrtýymen Almaty, Pavlodar jáne Ońtústik Qazaqstan oblystarynan at terletip sarbazdardyń ata-analary keldi.
Sonymen, belgilengen mezette, ıaǵnı saǵat tili 10-dy kórsetkende bólim jeke quramy Jeńis alańynda sap túzedi.
Oqý pýnktiniń bastyǵy, podpolkovnık Eskendir Jigitov polk komandıri podpolkovnık Mamaı Qurmantaevka jeke quramnyń áskerı ant qabyldaýǵa daıarlyǵyn baıandady. Bólimniń Jaýyngerlik týy alyp ótildi. Kóp uzamaı belgilengen bes núktede jastar áskerı anttyń kıeli mátinin jigerlene oqyp jatty. Osy aıtýly sátte óz balalaryn ózderi tanymaı qalǵan ata-analar ózara kúbirlesip, keıbireýleri kózderine jas ta aldy. Sarbazdardyń árqaısysy ózderin jaqsy kórsetýge tyrysty.
Odan keıin mereke qonaqtary men bólim basshylyǵy minbege kóterildi.
Ant qabyldaý rásimindegi saltanatty jıyndy polk komandıri podpolkovnık Mamaı Qurmantaev quttyqtaý sózben ashty.О́z kezeginde «Batys» óńirlik qolbasshylyǵy qolbasshysynyń orynbasary, polkovnık Isataı Járdemov, «Batys» óńirlik qolbasshylyǵy ardagerler keńesiniń tóraǵasy zapastaǵy podpolkovnık Sansyzbaı Tokashev, quqyq qorǵaý organdarynyń basshylary, din ókilderi jáne sarbazdardyń ata-analary aq tilekterin aıtyp, balalaryna batalaryn berdi.
Merekelik mıtıngten keıin jas jaýyngerler saptyq, qolma-qol urystyń kórsetpeli jattyǵýlaryn kórsetti.
Shara aıaqtalǵan soń jınalǵan meımandar kazarma úı-jaıyna, sarbazdar ashanasyna, medısınalyq beketke kirip, bólimniń tynys-tirshiligimen tanysty.Saltanat sońynda áskerı bólimniń klýbynda bólimniń úrmeli-aspaptar orkestri óz ónerin pash etti. Qonaqtardyń oıynan shyqqan orkestr quramy ózderiniń maqtaýǵa turarlyqtaryn taǵy da bir dáleldep berdi.
Konsertten keıin merekelik túski as berildi. Ásker qataryna kelgeli beri jas sarbazdar alǵashqy ret «serýenge shyǵý qaǵazyna» ıe boldy. Ata-analar men týystary kelip birge qydyryp ketip bara jatqan joldastaryna alys aımaqtardan ásker qataryna shaqyrylǵan basqa da sarbazdar qyzyǵa qaraıdy. Alaıda, áskerı bólimde bul másele de aldyn ala sheshilip qoıylǵan bolatyn. Qalǵan jas sarbazdar áskerı bólim basshylyǵynan mundaı sııapat kútpese kerek. Olar tús aýa mádenıet jáne demalys baǵyna jol tartty.
Merekelik jıynnan soń Pavlodar qalasynan kelgen qatardaǵy jaýynger Bekzat Ábishevtiń anasy Gúlmıra Sársenqyzyn sózge tarttyq. Ol óz sózinde: «Búgin tuńǵysh ulym Bekzattyń Otan aldyndaǵy áskerı ant bergen sátine kýáger boldym. Ulymyzdyń osy Oral shaharynda 5517 áskerı bóliminiń ishki áskerler sapynda qyzmet etetinine rızamyn. Jas sarbazdardyń áskerı ómirge qadam basqan joly aq bolsyn! Áskerı bólimniń basshylaryna aıtarym, balalarymyzdy otansúıgishtikke, joldastyqqa úırete bersin. Sarbazdar bergen anttaryna zaty laıyq azamattar bola bersin! Ata-analarynyń saǵynyp júrgenin bilip, azǵana ýaqytta osy áskerı mindetin abyroıly atqarsyn demekpin», – dedi.
Minekı, 5517 áskerı bólimdegi ant qabyldaý rásimi osylaı ótti. Elimizdiń Ishki áskerleriniń qatary jańadan kelgen 154 jas tolqynmen tolyqty.
Erbolat SULTANOV,
maıor.
Oral.