Qazaqstan Prezıdenti Qasym-Jomart Toqaev Germanııaǵa resmı sapary aıasynda GFR Prezıdenti Frank-Valter Shtaınmaıermen kezdesti dep habarlaıdy «QazAqparat» HAA menshikti tilshisi.
Kelissózder Germanııa Federaldy Prezıdentiniń rezıdensııasy sanalatyn Belvıý saraıynda ótip jatyr. Brandenbýrg qaqpasynyń janyndaǵy Shpree ózeniniń jaǵasynda ornalasqan bul saraı XVIII ǵasyrdyń aıaǵynda erte neoklassısızm stılinde salynǵan.
Germanııa Prezıdenti Frank-Valter Shtaınmaıer Qasym-Jomart Toqaevty saraıǵa kire beriste qarsy alyp, Qurmetti qonaqtar kitabynda lebizin qaldyrý úshin foıege alyp bardy. Osydan keıin Memleketter basshylary kelissózder zalyna bettedi.
«Prezıdentter ózara múddelilik bar keń aýqymdy máselelerdi, atap aıtqanda, Qazaqstan-Germanııa qarym-qatynastaryn, sondaı-aq, Ortalyq Azııadaǵy oqıǵalardy talqylaıdy» dedi QazAqparat tilshisine jaýap bergen Germanııa Federatıvtik Respýblıkasy Prezıdenti Keńsesiniń ókili Ester Ýleer.