Berlınde resmı saparmen júrgen Qasym-Jomart Toqaev Qaýipsizdik jónindegi Mıýnhen konferensııasynyń tóraǵasy Volfgang Ishıngermen kezdesý ótkizdi. Bul týraly Aqordanyń baspasóz qyzmeti habarlady.
Qazaqstan Prezıdenti Germanııa basshylyǵymen júrgizilgen kelissózderdiń nátıjelerine toqtalyp, Qazaqstan naryǵyna nemis bıznesin, tehnologııasy men ınvestısııasyn tartýdyń mańyzdylyǵy jóninde aıtty.
Volfgang Ishınger kelesi jyly ótetin kezekti Mıýnhen konferensııasyna daıyndyq barysy týraly málimet berip, Qazaqstan Prezıdentin atalǵan bedeldi jıynǵa qatysýǵa shaqyrdy.
Sonymen qatar taraptar halyqaralyq kún tártibindegi ózekti máseleler jóninde pikir almasty.