Nıý-Iorktegi Djon Kennedı atyndaǵy halyqaralyq áýejaıynda Dımash Qudaıbergendi álemniń túkpir-túkpirinen kelgen 150-ge tarta jankúıeri Qazaqstannyń týymen jáne gúl shoqtarymen kútip aldy. Bul týraly dimashnews.com habarlady.
Ártúrli memleketten jınalǵan kópshiliktiń arasynda jasy da, kárisi de bar. Dımashty qarsy alýshylardyń kópshiliginiń qoldarynda Qazaqstannyń kók týy jelbireıdi. Sonymen qatar súıikti ánshileriniń portrettik sýretterin de ustap shyqqandar kezdesedi.
Jankúıerleri qazaqstandyq tanymal ánshiniń konsertine sáttilik tiledi. Birneshe saǵattyq ushýdan keıin sharshaǵan Dımash olarǵa ádettegideı alǵysyn aıtyp, birge estelik fotolarǵa tústi.
Eske sala keteıik, Nıý-Iorktegi 19 myń kórermenge arnalǵan Barclays Center-de bolatyn Dımashtyń konserti jergilikti ýaqytpen 9 jeltoqsan kúni, Nur-Sultan qalasynyń ýaqytymen 10 jeltoqsan kúni ótedi.
Dımash «Arnau tour ENVOY» aıasyndaǵy saparynyń jańa baǵdarlamasymen óner kórsetedi dep kútilýde. Ánshiniń ózi buryn aıtqandaı, konserttik baǵdarlama kórermenderge qazaqtyń tól ónerin qazirgi zamanǵy ınterpretasııamen tanystyrady.
Dımashtyń barlyq qoıylymdarynan ulttyq naqyshtar baıqalyp turady. Osydan jankúıerlerdiń ánshini búkil álemge qazaq mádenıeti men mýzykasynyń habarshysy dep beker atamaıtynyn uǵamyz.Nıý-Iorktegi shoýdyń negizgi taqyryby – «Kosmos jáne Álemniń sheksizdigi». Árıne, bul sharanyń ázirge aıtylmaıtyn aqparattary da bar, olar qupııa túrde saqtalady.
Baǵdarlamada Qazaqstannyń astanasy – Nur-Sultanda ótken jazǵy konserttiń de eń jaqsy sátteri qamtylǵan. Sonymen qatar osy baǵdarlama úshin arnaıy jasalǵan jańa týyndylar da bar.Dımash ánderdi qazaq, aǵylshyn, orys jáne qytaı tilderinde shyrqaıdy.