Kolýmbııa astanasynda eki eldiń Syrtqy ister mınıstrleriniń orynbasarlary deńgeıindegi Qazaqstan-Kolýmbııa SIM-aralyq saıası konsýltasııasynyń kezekti raýndy ótti. Bul týraly SIM baspasóz qyzmeti habarlady.
Kelissózder barysynda Qazaqstan Syrtqy ister mınıstriniń orynbasary Erjan Ashyqbaev energetıka, taý-ken ónerkásibi salasyndaǵy ekijaqty yntymaqtastyqty damytýdyń jaqsy áleýetine, sondaı-aq Qazaqstan Respýblıkasynyń tranzıttik jáne kóliktik múmkindikteriniń tartymdylyǵyn eskere otyryp, shaǵynjáne orta bıznes arasynda iskerlik baılanystardy ornatýǵa nazar aýdardy. Qazaqstan syrtqy saıasat vedomstvonyń basshysy Muhtar Tileýberdiniń Kolýmbııanyń jańadan taǵaıyndalǵan Syrtqy ister mınıstri Klaýdıa Blıýmǵa arnalǵan quttyqtaýlardy jetkize otyryp, qazaqstandyq dıplomat Nur-Sultan qalasynda saıası konsýltasııalardyń kelesi raýndyn onyń qatysýymen ótkiziletinine senim bildirdi.
О́z kezeginde Kolýmbııa Syrtqy ister mınıstriniń orynbasary Fransısko Echeverrı saıası dıalogtyń damýyna joǵary baǵa berip, 2015 jyldan ótkizilip júrgen qazaqstandyq dıplomattar men Prezıdent janyndaǵy memlekettik basqarý akademııasynyń stýdentteri úshin ıspan tili kýrstaryn jalǵastyrýǵa daıyn ekendigin bildirip, saýda-ekonomıkalyq jáne mádenı-gýmanıtarlyq yntymaqtastyqtyń keńeıýine úmit bildirdi.
Kelissózder barysynda Taraptar halyqaralyq beıbitshilik pen qaýipsizdikti saqtaý, jańa synaqtar men qaýip-qaterlerge qarsy áreket etý, ıadrolyq qarýdy taratpaý jáne terrorızmge qarsy kúres máselelerimen tyǵyz jumys isteýge qyzyǵýshylyq bildire otyryp, sondaı-aq EYDU-ǵa qosylýdyń praktıkalyq aspektilerin talqylady jáne halyqaralyq uıymdar sheńberindegi ózara qoldaý týraly ýaǵdalasty.
Kelissózderdiń qorytyndylary boıynsha eki eldiń syrtqy saıası vedomstvolardyń ókilderi Dıplomatııalyq jáne qyzmettik pasporttardyń ıelerin vızalyq talaptardan bosatý týraly kelisimge qol qoıdy. Kelisimge qol qoıý ózara túsinistik qaǵıdasy negizinde azamattardyń qysqa merzimdi saparlary úshin jeńildetilgen vızalyq rejımdi tolyqtyratyn boldy.