Qazaqstan Respýblıkasy Parlamenti Senaty men Reseı Federasııasy Federaldyq Jınalysy Federasııa Keńesi arasyndaǵy Yntymaqtastyq jónindegi komıssııanyń 15-shi otyrysy Qazan qalasynda ótti. Bul týraly Parlament Senatynyń baspasóz qyzmeti habarlady.
Otyrys Qazaqstan Parlamenti Senatynyń tóraǵasynyń orynbasary Asqar Shákirov pen Reseı Federasııa Keńesi tóraǵasynyń orynbasary Ilıas Ýmahanovtyń tóraǵalyǵymen ótti. Otyrysqa Qazaqstan tarapynan Parlament Senatynyń depýtattary Muhtar Qul-Muhammed, Vladımır Volkov, Olga Perepechına, Ǵumar Dúısembaev, Jeńis Nurǵalıev, Tóleýbek Muqashev, Qaırat Qojamjarov, Talǵat Musabaev, Dana Nurjigitova jáne Nurjan Nursıpatov qatysty.
Otyrys barysynda shekara mańy yntymaqtastyǵyndaǵy sandyq ekonomıka, ultaralyq jáne konfessııaaralyq únqatysý máseleleri, sondaı-aq III Eýrazııalyq áıelder forýmyna daıyndyq barysy qaraldy.
Senat tóraǵasynyń orynbasary, Komıssııanyń qazaqstandyq taraptan teń tóraǵasy Asqar Shákirov óz sózinde komıssııanyń sońǵy birneshe jylda Omby, Oral, Atyraý, Sochı, Altaı ólkesi, Aqtaý jáne Almaty qalalarynda ótken otyrystarynyń nátıjeli bolǵanyn atap ótti.
Senat basshysy orynbasarynyń aıtýynsha, komıssııanyń jumysy barysynda joǵarǵy Palatalar depýtattary ekijaqty yntymaqtastyqtyń aýqymdy máselelerin talqylap, ulttyq zańnamalardy jaqyndastyrý jáne Qazaqstan-Reseı áriptestigin tereńdetýdiń ońtaıly joldaryn izdestirýde mańyzdy isterdi júzege asyrdy.
«Tek sońǵy 5 jylda Qazaqstan Parlamenti Reseımen jasalǵan 26 halyqaralyq kelisimdi bekitti, ol Qazaqstan-Reseı qarym-qatynastarynyń damýyna oń áser etti», dedi A.Shákirov.
Ilıas Ýmahanov óz sózinde Federasııa Keńesi úshin qazaqstandyq áriptestermen aımaqaralyq baılanystardy nyǵaıtýdyń mańyzy zor ekenin atap ótti. Komıssııanyń kelesi otyrysy Qazaqstanda ótetin boldy.
Senatorlar shara aıasynda Tatarstan Respýblıkasyndaǵy qazaq dıasporasymen kezdesti. Kezdesýde eki el arasyndaǵy dostyq qatynastardy damytý, áleýmettik-ekonomıkalyq baılanystardy odan ári damytý, ulttyq qundylyqtardy, onyń ishinde qazaq tilin, mádenıeti men dástúrlerin saqtaý men damytý máseleleri talqylandy.