Qazan qalasynda Qazaqstan Respýblıkasy Parlamenti Senaty Halyqaralyq qatynastar, qorǵanys jáne qaýipsizdik komıteti men Reseı Federasııasy Federaldyq Jınalysy Federasııa Keńesi Halyqaralyq ister jónindegi komıtetiniń jáne Qorǵanys jáne qaýipsizdik jónindegi komıtetiniń birlesken otyrysy boldy. Bul týraly Parlament Senatynyń baspasóz qyzmeti habarlady.
Otyrysqa qatysýshylar Ortalyq Azııa aımaǵyndaǵy qazirgi jaǵdaıdy, atap aıtqanda halyqaralyq parlamenttik uıymdardaǵy jumysty úılestirýdi, Qazaqstan-Reseı shekarasyndaǵy ótkizý beketterindegi ınfraqurylymdy damytýdy, Jaıyq ózeniniń ekojúıesin saqtaý máselelerin, sondaı-aq mádenı-gýmanıtarlyq ózara is-qımyldy talqylady.
Komıtet tóraǵasy Muhtar Qul-Muhammed óz sózinde Ortalyq Azııa memleketteriniń basshylary aımaqtyq yntymaqtastyqtyń negizgi basymdyqtary men ózara qarym-qatynastyń barlyq baǵyttaryndaǵy áriptestikti keńeıtý josparlaryn belgilengenin atap ótti.
Senator aımaqtaǵy kórshi eldermen jan-jaqty jáne ózara tıimdi baılanystardy damytý Qazaqstannyń syrtqy saıasatynyń basymdyǵy bolyp tabylatynyn, taıaýda eki memleket basshylary Qasym-Jomart Toqaev pen Vladımır Pýtınniń qatysýymen Omby qalasynda ótken ótken forýmnyń qorytyndysy oǵan dálel ekenin atap ótti.
Komıtet basshysy sondaı-aq Ortalyq Azııa memleketteri ózara qurmet pen senim qaǵıdattaryna negizdelgen tyǵyz tatý kórshilik qarym-qatynastaryn qalyptastyrýǵa umtylý men óńirdegi ózekti máselelerdi sheshýde birlesken kúsh-jigerdi úılestirýdi belgilegenin atap ótti.
Birlesken otyrysqa Qazaqstan tarapynan senatorlar Tóleýbek Muqashev, Qaırat Qojamjarov, Talǵat Musabaev, Dana Nurjigitova jáne Nurjan Nursıpatov qatysty.