«Degdar» qaıyrymdylyq qory jáne «Qazaqkonsert» memlekettik konserttik uıymy Nur-Sultan qalasynda «Tańǵajaıyp áýen» festıvali aıasynda qaıyrymdylyq konsertin ótkizdi.
Keshte balalardy qoldaýǵa arnalǵan operetta men mıýzıklderdiń tanymal arııalary shyrqaldy. Darıǵa Nazarbaeva, Medet Shotabaev, Meıir Baınesh, Álfııa Kárimova, Azat Málik, Azamat Jyltyrkózov, memlekettik «FORTE TRIO» trıosy, «Astana Opera» teatrynyń sımfonııalyq orkestri men hory, dırıjer Abzal Muhıtdınov meımandarǵa merekelik kóńil kúı syılady. Keshti teatr jáne kıno akteri Shyńǵys Kapın júrgizdi.
Qor dırektory Laýra Ahmetova kórermenderge arnaǵan sózinde kómek kórsetkenderge alǵysyn bildirip, qaıyrymdylyqqa arnalǵan qarjynyń qaıda jumsalatynyn aıtty: «О́tken jyly festıval aıasynda 52 mıllıon teńge qarajat jınalyp, tórt aýyldyq balalar úıi arasynda bólingen bolatyn. Onda 209 bala qamtyldy. Bıyl 315 balany qamtýdy josparlap otyrmyz. Festıval aıasynda jınalǵan barlyq qarajat aýyldyq jerlerdegi balalar úılerin jabdyqtaýǵa baǵyttalady. Qarajat jınaý áli de jalǵasyp otyr ári qaıyrymdylyq sharasyna bárimiz de qatysa alamyz».
Bıylǵy qaıyrymdylyq jınaǵy aýyldyq jerlerdegi tórt balalar úıiniń muqtajyna jiberiledi. Olar Aqmola oblysyndaǵy balabaqsha-mektep-ınternaty, Shyǵys Qazaqstan oblysyndaǵy №8 balalar úıi, Qaraǵandy oblysyndaǵy jetim balalar men ata-ana qamqorlyǵynsyz qalǵan balalarǵa arnalǵan Lıtvınsk mektep-ınternaty jáne Qostanaı oblysyndaǵy ortalyq júıke júıesi organıkalyq zaqymdalǵan jáne psıhıkasy buzylǵan balalarǵa arnalǵan Rýdnyı mamandandyrylǵan balalar úıi.
Qarajat sonymen qatar erekshe akterler teatrynyń jumysyn qoldaýǵa baǵyttalatyn bolady.