Aqtóbede jeltoqsan aıynyń alǵashqy on kúndigi ishinde oryn alǵan keleńsiz jáıt qoıdy qasqyrǵa laqtyrǵandaı áser qaldyrady.
Máseleniń mánisi mynada. Tańǵy saǵat bes kezinde Aqtóbe qalasynyń turǵyny polısııa bólimshesine qońyraý shalyp avtokóligi urlanǵanyn habarlaıdy. Sodań soń osy derek boıynsha izge túsken saqshylar Qonaev kóshesi boıyndaǵy №9 úıdiń janynan azıattyq ult belgisindegi tórt jas azamat «VAZ-2114» avtokóligin aıdap alyp ketkenin anyqtaıdy.
Biraz ýaqyttan soń kezekshi patrýl qala syrtynda qarǵa maltyǵyp qalǵan «VAZ-2114»-pen onyń salonynda otyrǵandardy qolǵa túsiredi. Osy kezde olar dál jaýap berýden jaltaryp syrǵaqsı eredi. Munda bir gáp bar ekenin sezgen patrýlder ári beriden keıin avtokólikti aıdap ketkender ózderiniń áriptesteri ekenin bilip aıranasyr kúıge túsedi. Iаǵnı bular Aqtóbedegi mamandandyrylǵan kúzet basqarmasynyń qyzmetkerleri bolyp shyǵady. Azyn shoǵyn ýaqyt sózben yrǵasyp, tájikeleskennen keıin ustalǵandar patrýldyq baılanys kezekshilerine ózderiniń áriptes ekendikterin alǵa tartyp bosatyp jiberýlerin suraıdy. Ári avtokólikti urlaý nemese tonaý úshin emes, jáı ánsheıin qyzyq kórip seıildep qaıtý úshin aıdap ketkenderin aıtyp aqtalady. Bul jerde biz qylmys jasadyq dep eseptemeımiz. Bar aıybymyz – áýesqoılyq sezimniń jeteginde ketip qalǵanymyz. Mine, avtokólikti ózderińiz kórip tursyzdar. Murty da buzylǵan joq dep aqtaldy tórteý.
Alaıda olardyń bul ýájderi nazarǵa alynbaı, áriptesterdiń talap-tilekteri eskerilmeı patrýldikter kólik salonynda otyrǵandardyń qoldaryna kisen salyp polısııa bólimshesine alyp ketedi. Qazirgi kúni Aqtóbe oblystyq polısııa departamenti menshikti qaýipsizdik basqarmasy atalǵan derek boıynsha tıisti tekserýler júrgizýde. Sondaı-aq atalǵan departamenttegi baspasóz qyzmetiniń jetekshisi Erbolat Sarqulovtyń aıtýynsha avtokólikti aıdap ketkenderge QR Qylmystyq kodeksiniń «Tonaý» baby boıynsha sotqa deıingi tekserý jumystary júrgizilýde. Máseleniń anyq-qanyǵy osy tekserýlerdiń nátıjeleri boıynsha anyqtalmaq. Qazirgi kezde avtomobıldy qymqyryp «Seıil» qurǵysy kelgenderdiń tórteýi de qyzmetterinen bosatyldy.
Aqtóbe