Lázzat Asanova 1986 jyldyń qaıǵyǵa toly, yzǵarly jeltoqsany qazaq eliniń tarıhynda óshpes iz qaldyrdy. Otanyn súıgen jalyndy jastardyń erligi elimizdiń táýelsizdik jolyndaǵy alǵashqy qadamy edi.
Jeltoqsanshylardyń biri – Lázzat Asanova ereýildi alańnan oralmaǵan qaısar qyzdardyń biri. Egemendik úshin qurban bolǵan jastarymyzdyń batyl qadamy búginde jastar arasynda keńinen nasıhattalyp júr. Táýelsizdik kúni qarsańynda qalanyń barlyq mektepterinde tól merekege arnalǵan ashyq sabaqtar ótýde. Bul sharalar, sonymen bir mezgilde «Rýhanı jańǵyrý» baǵdarlamasy aıasynda ótip jatyr.
Almatydaǵy №152 gımnazııa oqýshylary búgin táýelsizdik úshin baqılyq bolǵan Lázzat Asanovanyń anasyna qurmet kórsetip, 1986 jyldyń jeltoqsanynda Otan úshin jan tapsyrǵan barlyq azamattardy eske aldy.
Almatynyń Chaıkovskıı atyndaǵy mýzykalyq ýchılıshesinde qobyzshy mamandyǵy boıynsha dáris alǵan Lázzat Asanova nebary 16 jasta edi. Biraq el basyna kún týǵanda boıjetken kommýnıstik rejımniń otarshyldyq saıasatyna qarsy batyl shyǵyp, Qazaqstannyń egemendigi úshin qurban bolǵan. Táýelsizdik merekesi qarsańynda oqýshylarmen kezdesýge kelgen onyń anasy Altynaı sol bir qaıǵyly kúndi kúrsinip eske alady.
«1986 jyldy eske alý óte aýyr. Qazir qatty tolqyp turmyn. Ol kúndi aıtpasam da, halyq biledi. Qazir halyqtyń kózi ashyq. Bárin túsindi. Men halqyma, jastarǵa senemin. Endi ondaı náýbet qazaq eline kelmesin. Qazaq eline óz eliniń, óz jeriniń qyzyǵyn kórýge Alla násip etsin», – dedi L. Asanovanyń anasy Altynaı Qaýmetqyzy.
2008 jyldyń qarashasynda Jarkent qalasynda «Jeltoqsan» kóterilisiniń qurbany Lázzat Asanovaǵa eskertkish ashylǵan bolatyn. Táýelsizdik jolynda baqılyq bolǵan ul-qyzdardyń erligi búgingi jáne keler urpaqqa qashan da amanat bolmaq.
«Táýelsizdik kúni Jeltoqsan kóterilisi qazaq jastarynyń qaısarlyǵynyń, erliginiń arqasynda kelgen. Osy Táýelsizdik – bolashaq urpaqqa amanat. Men búgingi jastarǵa senemin», - dedi L. Asanovanyń anasy Altynaı Qaýmetqyzy.
Táýelsizdik kúni – eń qasterli kún. Bostandyq úshin kúresken qaısar qyz Lázzat Asanovanyń jaýyngerligi búginde jastar arasynda keńinen nasıhattalyp júr. Elimizdiń bilim oshaqtarynda ár jeltoqsan saıyn egemendik úshin qurban bolǵan azamattardy eske alý sharalary turaqty túrde ótip turady.
«Rýhty jastarymyzdy otansúıgishtikke, elin súıýge tárbıeleý osy búgingi kúngi is-sharalardyń negizgi maqsaty bolyp tabylady. Osy rette «Jeltoqsan» qozǵalysynyń, Táýelsizdik jolynda azattyq kúrestiń batyry Lázzat Asanovanyń anasyn shaqyrylyp otyr», – dedi Almaty qalasy № 152 mektep-gımnazııa dırektory Rımma Ábdikárimova.
Táýelsizdik – eń aldymen qazaq halqynyń bostandyqqa umtylǵan asqaq armany men qaısar rýhynyń jemisi. Egemendik úshin janyn aıamaǵan azamattar el esinde máńgi qalmaq.
ALMATY