Astana prosesi aıasyndaǵy eki kúnge sozylǵan kelissózder negizinen jabyq esik jaǵdaıynda ótti. Túıini tarqamaǵan túıtkilderdi talqylaǵan taraptar ekinshi kúni ǵana buqaralyq aqparat quraldaryna arnap qorytyndy jıyn jasady. Is-sharada sóz sóılegen Qazaqstan Syrtqy ister mınıstriniń birinshi orynbasary Shahrat Nuryshev Astana prosesiniń kezekti raýndy jemisti aıaqtalǵanyna toqtaldy.
«Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń úzdiksiz qoldaýymen júzege asyrylyp kele jatqan Sırııa boıynsha Astana prosesiniń kezekti 14-raýndy aıaqtaldy. Sońǵy eki kún ishinde kelissózge qatysýshylar Sırııadaǵy jaǵdaıdy odan ári turaqtandyrýǵa jáne ondaǵy gýmanıtarlyq jaǵdaıdy jaqsartýǵa baǵyttalǵan asa mańyzdy ári mazmundy kelissózder ótkizdi», dedi Sh.Nuryshev.
Kelissózderdiń kezekti raýndyn qorytyndylaǵan vıse-mınıstr Astana prosesi mańyzyn taǵy bir márte dáleldep, kóptegen ózekti máselede naqty nátıjelerge qol jetkenin atap ótti. «Búgingi kelissózderdiń barlyq taraptary osy nátıjege úles qosty», dedi Syrtqy ister mınıstriniń birinshi orynbasary.
Budan keıin Sh.Nuryshev kepilger elder – Iran, Reseı, Túrkııanyń birlesken málimdemesimen tanystyrdy.
«Iran, Reseı jáne Túrkııa Astana prosesiniń kepilger-memleketteri retinde Sırııa Arab Respýblıkasynyń egemendigin, táýelsizdigin jáne aýmaqtyq tutastyǵyn, sonymen qatar BUU maqsattary men ustanymdaryn buljymastan moıyndaıtynyn qýattady. Bul ustanymdar saqtalýy jáne qurmettelýi tıistigin atap ótti», delingen málimdemede.
Sonymen qatar kepilger-memleketter terrorızmmen kúresti jeleý etip, zańsyz derbes basqarýǵa, Sırııa jerinde jańa realııa qurýǵa jol bermeý qajettigine toqtaldy. Osylaısha, Sırııanyń egemendigi men aýmaqtyq tutastyǵyn buzýǵa baǵyttalǵan, kórshi elderdiń qaýipsizdigine qater tóndiretin separatıstik josparlarǵa qarsy turýda tabandylyq tanytatynyn bildirdi.
Kepilger elder munaıdyń jáne ony satýdan túsken kiristiń Sırııa úkimetine tıesili ekenine de basa nazar aýdarǵan. Málimdemede Izraıl tarapynan qarýly shabýyldyń jalǵasyp otyrǵanyn aıyptap, mundaı árekettiń halyqaralyq jáne halyqaralyq gýmanıtarlyq quqyqqa qaıshy keletini, Sırııa men kórshiles elderdiń egemendigine nuqsan keltirip, óńirdegi turaqtylyq pen qaýipsizdikke qater tóndiretini aıtylǵan.
«Sırııanyń soltústik-shyǵysyndaǵy ahýaldy talqylap, bul aımaqta uzaqmerzimdi turaqtylyq pen qaýipsizdikke qol jetkizý eldiń egemendigi men aýmaqtyq tutastyǵyn saqtaý negizinde ǵana múmkin ekenine kelisti. Osyǵan oraı 2019 jylǵy 22 qańtarda SAR-dyń soltústik-shyǵysyn turaqtandyrý boıynsha memorandýmǵa qol qoıylýyna qoldaý bildirip, 1998 jylǵy Adan kelisiminiń mańyzdylyǵyn rastady», dedi kepilger elderdiń málimdemesin oqyp bergen Sh.Nuryshev.
Sondaı-aq jıyn barysynda Astana prosesiniń kelesi raýndy qashan ótetini de sóz boldy. Syrtqy ister mınıstriniń birinshi orynbasary Sh.Nuryshevtyń aıtýynsha, kelesi kelissózder 2020 jylǵy naýryzǵa josparlanǵan.
«Kepilger-memleketter Sırııa boıynsha Astana prosesiniń 14 halyqaralyq kezdesýin Nur-Sultanda ótkizgeni úshin Qazaqstan bıligine shynaıy rızashylyǵyn bildirdi. Astana formatyndaǵy Sırııa boıynsha kelesi halyqaralyq kezdesýdi 2020 jylǵy naýryzda Nur-Sultanda ótkizý týraly sheshim qabyldady», dedi kepilger-memleketterdiń málimdemesin oqyǵan vıse-mınıstr.
Sondaı-aq birlesken málimdemede Astana formatyndaǵy beıindi jumys tobynyń aıasynda zorlyqpen ustalǵan tulǵalardy, kepilge alynǵan adamdardy bosatý operasııalaryn jalǵastyrý qajettigi aıtylǵan. Sırııanyń búkil aýmaǵynda barlyq sırııalyqtarǵa gýmanıtarlyq járdemdi arttyrýǵa da erekshe nazar aýdarylǵan.
Atap aıtqanda, Sırııadaǵy gýmanıtarlyq ahýaldy jaqsartýǵa qoldaý kórsetý maqsatynda halyqaralyq qoǵamdastyq, BUU jáne onyń gýmanıtarlyq agenttikterdi sırııalyqtarǵa kómekti ulǵaıtýǵa shaqyrdy.