Búgin Táýelsizdik kúnine oraı elorda ákiminiń orynbasary Baqtııar Máken «Qamqor» áleýmettik qyzmet kórsetý ortalyǵynyń jumysymen tanysyp, qyzmetkerlerge ákimniń jáne ákimniń orynbasary atynan alǵys hattardy tapsyrdy. Bul týraly Nur-Sultan qalasy ákimdiginiń baspasóz qyzmeti habarlady.
«Qamqor» áleýmettik qyzmet kórsetý ortalyǵy 2005-jyldan quryldy. Qazirgi ýaqytta ortalyqta 248 adam qyzmet jasap, 348 adam arnaıy áleýmettik qyzmetter alýda. Sońǵy úsh jyldyń ishinde 8 qyzmet alýshy qoǵamǵa qosylyp, sonymen qatar qamqordaǵylardy qoǵamǵa beıimdeý úshin ózdigimen turýǵa arnalǵan úıler ashyldy.
Al 2018 jyly qala ákimdigi men Jumyspen qamtý jáne áleýmettik qorǵaý basqarmasynyń qoldaýymen 100-oryndyq jańa ǵımarat salynyp, qoldanýǵa berildi. Jańa ǵımaratty salý kezekte turǵan 100-den astam adamǵa qyzmet kórsetýge jaǵdaı jasady. Sondaı-aq 2018 jyldan beri ortalyqta eńbek terapııasy kabınetteri, bı zaly, tuzdy bólme jumys jasaı bastady.
2019 jyly ortalyq aýmaǵyn qorshaýyna kúrdeli jóndeý jumystary júrgizildi. Qyzmet alýshylardyń qaýipsizdigi jáne ortalyqta turýyna jaqsy jaǵdaılar jasaý úshin ortalyq aýmaǵyna abattandyrý jumystary júrgizilýde.
Odan bólek, «Qamqor» áleýmettik qyzmet kórsetý ortalyǵynda kóptegen mádenı, sporttyq saýyqtyrý sharalary ótkizilip turady. Qyzmet alýshylar Special Olympics baǵdarlamasy boıynsha búkilálemdik arnaıy olımpıadalyq oıyndarǵa qatysyp otyrady. Aıta ketsek, 2017 jyly Avstrııadaǵy qysqy búkilálemdik arnaıy olımpıadalyq oıyndarda taý shańǵysy oıynynan 3-altyn, 2-kúmis medal, 2018-jyly Lıýksembýrgta bochcheden 1-kúmis, 2-qola medal, 2019-jyly BAÁ Abý-Dabı qalasynda badmıntonnan 4-oryn aldy.