Úsh aıǵa sozylǵan bilim báıgesine Almaty qalasy orta bilim berý uıymdarynan 67 ustaz qatysyp, óz baqtaryn synady. Atalmysh shara «Rýhanı jańǵyrý» baǵdarlamasy sheńberinde uıymdastyryldy.
Qalamyzdyń 8 aýdanynan irikteýden ótken 21 qatysýshy baıqaýdyń qalalyq kezeńinde ózderin ár qyrlarynan tanytqan.
Aıta ketelik, óskeleń urpaqty tárbıeleýde mańyzy zor bul baıqaý Prezıdent Qasym-Jomart Kemelulynyń «Bilim jáne ǵylym» konferensııasynda kótergen máselelerdi qoldaý baǵytynda, muǵalim mártebesin kóterý maqsatynda Almaty qalasy ákimdiginiń qoldaýymen jáne Almaty qalasynyń Máslıhat depýtaty Murat Ádilhanovtyń demeýshiligimen ótti.
«Ár aýdannan qalaǵa jeńimpazdar jınalyp, onyń ishinde mine 20-dan astam qatysýshy irikterilip otyr. Osyǵan oraı, men búgin jeńimpazdardyń barlyǵyn quttyqtaımyn. Endi osy 20 ustazdyń ózi jastarǵa qansha úlgi bolady», - dedi Almaty qalalyq máslıhatynyń depýtaty Murat Ádilhanov.
Atalmysh baıqaýdyń basty maqsty – ustazdardyń ál-aýqatyn arttyryp, turmys sapasyn kóterý. Básekege qabiletti, jańashyl, ozyq tájirıbeli muǵalim mártebesin kóterýge baǵyttalǵan bul saıysqa aldyn ala ótkizilgen irikteý nátıjesinde ozyp shyqqan jeńimpazdarǵa maqtaý dıplomdarymen birge qomaqty qarjylaı syılyqtar tabys etildi. Baıqaý qorytyndysy boıynsha 200 000 tg kólemindegi 3-oryndy №180 jalpy bilim beretin mekteptiń muǵalimi Quralaı Ahmetova ıelendi.
Júlde qory 300 000 teńgelik 2-oryndy №148 mektep-gımnazııanyń muǵalimi Gúljan Dorvethan jeńip aldy. Al, 500 000 teńgelik báıgeli 1-oryndy №168 mektep-gımnazııanyń muǵalimi Eldar Abdykalykov qanjyǵasyna baılady. «Avtokólik» taǵaıyndalǵan bas júlde №59 mektep-gımnazııanyń ustazy Hasen Zárýge buıyrdy.
«Konkýrsqa úlken daıarlyqpen keldik. Árqashan adam aldyna maqsat qoıý kerek. Maqsatymyz osy - bas júldeni alý kerek bolatyn. Osy jolda úlken jumystar jasadyq. Jas urpaqtyń boıyna bir jaqsy bilim nárin, ulttyq ıdeologııany sińirdik degen oıdamyz», - dedi Qasyl Qatyqbaeva atyndaǵy «Ustaz mártebesi – ult mereıi» baıqaýynyń jeńimpazy Hasen Zárý.