Ortalyq memlekettik arhıvtegi oqý zaly júz jyldyq tarıhy bar muraǵatpen qatar zertteýshilerge qyzmet kórsetip keledi.
Ǵımarattyń oqý zalynda Qazaqstannyń belgili ǵalymdary Álkeı Marǵulan, Aqjan Mashanov, Ermuqan Bekmahanov jáne taǵy basqa da ǵalymdar arhıv qujattary negizinde qazaq eliniń tarıhyn, geologııalyq, arheologııalyq qazba baılyqtaryn anyqtaý maqsatynda zertteý jumystaryn júrgizip, dúnıejúzilik, odaqtyq kólemde birneshe monografııa jarııalaǵany belgili.
Bıyl jaz aılarynda júrgizilgen jóndeý jumystarynan keıin muraǵat ishiniń bólmeleri zamanaýı sıpatqa enip, qyzmetkerler de keń tynyspen iske kirisip ketkendeı. Búginde otandyq ǵalymdarmen qatar memlekettik Arhıv qyzmetine AQSh, Germanııa, Italııa, Avstrııa, Reseı, Ońtústik Koreıa jáne basqa elderden kelgen zertteýshilerdiń de qyzyǵýshylyǵy zor.
Kitaphananyń saltanatty ashylýynda Ortalyq memlekettik arhıv dırektory Arnur Qarymsaqov sóz sóılep, jańa múmkindikter jaıyn pash etse, Sh. Ýálıhanov atyndaǵy Tarıh jáne etnologııa ınstıtýtynyń dırektory Zııabek Qabyldınov muraǵat basshylyǵy men qyzmetkerlerine alǵysyn bildirdi.
Abaı dańǵyly boıynda ornalasqan Ortalyq memlekettik arhıvi men Ulttyq kitaphana ǵımaratynyń bir-birine jaqyn ornalasýy endigi kezekte ǵalymdarǵa ýaqytyn únemdeýge de múmkindik beredi. Ulttyq kitaphana dırektorynyń orynbasary Ajar Hamıtqyzy kitaphananyń zamanaýı sıpatta bezendirilýi zertteýshilerge izdeniske ǵana emes, sergektik jaǵdaılaryna da múmkindikter qarastyrylyp otyrǵandyǵymen erekshelenedi dep atap ótti.
Oqý zalynyń jetekshisi Aıgúl Shalabaevanyń aıtýynsha, bul basylymdar osy Arhıvten tabylǵan ári zertteýshiler izdenisi negizinde jaryqqa kórgen zertteýler. Jańa pishin, jańa úlgide ashylǵan oqý zalyna qazirgi kezde úsh júzge jýyq basylym jınaqtaldy.
ALMATY