Kókshetaýda Qazaqstannyń halyq aqyny Kóken Shákeevtiń 95 jyldyǵyna arnalǵan «Meniń daýysym – buqaranyń óz úni» atty taqyrypta respýblıkalyq aqyndar aıtysy bolyp ótti.
Aıtys dese delebesi qozbaıtyn qazaq kemde-kem bolar. Atadan balaǵa mıras bolǵan osy bir aqsúıek ónerge degen halyqtyń yqylasy ejelden erekshe.
Ádette, sóz bastaý ońaı emes. Alǵashqy jup bolyp ortaǵa shyqqan arshalylyq Qurmet Quralhan men aqtóbelik Nartaı Tileýqul. Qarsylasynyń áýselesin «á» degennen-aq basa bilgen Nartaı aıtys ónerinde birshama ysylǵan aqyn ekendigin birden ańǵartty. Bizdiń óńirdegi talantty jastardyń biri Qurmet te osal emes edi. Jyl basynda halyqaralyq deńgeıde ótken dodada top jarǵan Qurmetten halyq óresi bıik óner kútken. Deı tursaq ta, keraǵar pikir, oıdyń qaıtalanýy, uıqastyń solǵyndyǵy baıqalyp turdy. Osylaısha, bul joly Qurmet óz babynda emes ekendigin ańǵartyp aldy.
Almatylyq arý Aıaýlym Jumabekqyzy men qyzyljarlyq Jumabek Rahym qyz ben jigit aıtysynyń ádemi kórinisin pash etti. Ásirese, Aıaýlymnyń sahnada ózin-ózi ustaýy, tosylmastan taban astynda sýyryp salyp sózben bezbendeýi, qarsylasynyń «qyńyr» suraǵyna ádepten ozbaı ádemi qaljyńmen oı tastaýy kórermenin ózine tánti ete tústi. Al, Jumabek aqynnyń dombyra shertýi, maqamy, daýysy jaqsy bolǵanymen, bul joly sózden tosyldy. О́kinishtisi, jas aqyndardyń arasynda sózge toqtaý, den qoıa bilý máselesi kemshin. Bul syn tek qana osy jupqa ǵana qatysty emes. «Ár nárseniń óz dámi bar» demekshi, tapqyrlyqpen bergen jaýapty qaıta-qaıta qaýzaýdyń da ózi artyq. Bul aıtysta Jumabek te osyny eskermegen. Almatylyq aqyn qyz qarsylasynyń «toqalym bol» dep usynys bildirgen sózine, taban astynda:
«Jumabek erkeletken arý qyzyn, Jumabekke toqaldyqqa bere almaıdy» dep jaýap qaıtara bilýin tapqyrlyqqa baladyq. Úshinshi jupta Kóken Shákeev atyndaǵy aqyndar mektebiniń shákirti Dýman Samat pen Nur-Sultan qalasynan topqa túsken Ardakereı Kápuly aıtysty. Kóken Shákeevtiń 95 jyldyǵyna arnalǵan jyr dodasynda ataqty abyz atyndaǵy mekteptiń atynan, onyń árjaǵynda Kókshe deıtin qalyń eldiń namysyn qorǵap shyqqan Dýmanǵa halyqtyń yqylasy hám úmiti zor edi.
Tórtinshi jupta qostanaılyq Toba О́tepbaı men Kókshe óńirine esimi jyǵa tanys Nurıslam Ábdil baq synasty. Nurıslam óz sózinde qoǵamdy jaılaǵan jemqorlyq máselesin tilge tıek etse, aqyn Toba onyń sózin ilip áketip, bul taqyrypty tereńinen qozǵaı bildi. Qostanaılyq aqyn asyqpaı-aptyqpaı, óz oıyn ádemi mánermen jetkize biledi eken. Halyq ta ony den qoıa tyńdap, qoshamet kórsetip otyrdy. Nurıslam men Tobanyń aıtysy aǵa men ininiń arasyndaǵy syılastyqqa quralǵan kórinis desek artyq bolmas.
Sońǵy jupta sóz talastyrǵan ereımentaýlyq Erlan Dáýlet pen qyzyljarlyq Jarqyn Juparhan. Bul eki aqyn da sóz ónerin jaqsy meńgergen, óz isiniń kásibı sheberleri desek jańylmaspyz. Sebebi, Erlan men Jarqyn talaı ret respýblıkalyq dodalarda júldeli oryndardan kórinip júrgen tarlanbozdar. О́leń sózde bir-birine des bermegen olar halyqtyń dem bergen qoshemetine arqalana tústi.
Qazylar alqasynyń sheshimimen aqtyq synǵa Nartaı Tileýqul, Aıaýlym Jumabek, Erlan Dáýlet, Dýman Samat joldama aldy. Shappa-shap aıtysta sýyrypsalma ónerin pash etken aqyndar halyqtyń qoshametine bólendi. «Alýan-alýan júırik bar, áline qaraı shabatyn», demekshi, aıtys qorytyndysy boıynsha Bas júlde Erlan Dáýletulyna buıyryp, ol Kókshetaý qalasy ákiminiń arnaıy dıplomymen jáne baǵaly syılyǵymen marapattaldy. Júldeli birinshi oryndy aqtóbelik Nartaı Tileýqul ıelense, ekinshi orynmen almatylyq Aıaýlym Jumabek marapattaldy. Úshinshi orynnan kókshetaýlyq jas aqyn Dýman Samat kórindi. Aıtysqa qatysqan barlyq qatysýshylar uıymdastyrý alqasynyń atynan baǵaly syılyqtarmen marapattaldy.