Parlament Senatynyń Tóraǵasy Darıǵa Nazarbaeva parlamenttik tyńdaýlarǵa daıyndyq aıasynda elimizdegi kartop jáne kókónis ósirýshiler odaǵy men toń-maı salasy qaýymdastyǵynyń basshylarymen birqatar jumys babyndaǵy kezdesýler ótkizdi. Bul týraly Parlament Senatynyń baspasóz qyzmeti habarlady.
Birinshi kezdesý kartop jáne kókónis ósirýshiler odaǵynyń ókilderimen boldy.
Kezdesýde Qazaqstan kartop jáne kókónis ósirýshiler odaǵynyń basqarma tóraǵasy Qaırat Bısetaev sóz alyp, elimizdegi kartop sharýashylyǵynyń tabysty damýyna qatysty máselelerdi atap ótti. Kartoptyń ónimdiligi men sapasyn arttyrý, kartop sharýashylyǵyndaǵy ınfraqurylymdy damytý jáne kartoptyń eksporty men óńdelýin damytý salany órkendetýge yqpal etedi.
K.Bısetaev kartopty ótkizýdiń kóleńke tustary salaǵa keri áserin tıgizip otyr dep sanaıdy. Kartop jáne kókónis ósirýshiler odaǵynyń tóraǵasy bul problemany sheshý úshin oblystar men respýblıkalyq mańyzy bar qalalarda kóterme-bólý ortalyqtaryn qurýdy usyndy. «Kókónis ónimderi men kartoptyń kóterme saýdasy boıynsha osyndaı ortalyqtar azyq-túlik naryǵy sýbektileri arasynda azyq-túlik baǵasyn tómendetýge múmkindik beredi», dedi Q.Bısetaev.
Basqa elderdegi osyndaı tájirıbeni zertteýdi qosymsha tapsyrǵan D.Nazarbaeva kóterme-taratý ortalyqtaryn qurýǵa qoldaý bildirdi.
Kelesi kezdesý elimizdiń maı salasyn damytýdyń qazirgi jaǵdaıy men keleshegine arnaldy.
«Qazaqstan maı-tońmaı odaǵy» qaýymdastyǵy» ZTB prezıdenti Konstantın Nevzorov sala kásiporyndary tap bolatyn negizgi qıyndyqtar týraly aıtyp berdi. Ol tuqymdyq materıal ónimdiliginiń tómendigi, mıneraldyq tyńaıtqyshtar óndirisiniń kenje qalýy, ónimdi saqtaý ınfraqurylymynyń jaı-kúıi, aýyl sharýashylyǵy tehnıkasynyń tozýy, bilikti kadrlardyń tapshylyǵy jáne agrotehnologııalardy saqtaýdyń jetkiliksiz deńgeıine toqtaldy.
K.Nevzorov júzdesý barysynda dúken sórelerindegi jalǵan ónimderdi tekserý, aldyn alý jáne jedel alyp qoıý tetikterin ázirleý qajettigine talqylaýǵa qatysýshylardyń nazaryn aýdardy. Qaýymdastyq basshysy sary maı men spredter (ósimdik jáne sút maılarynyń qospasy negizindegi maı ónimderi) boıynsha jaǵdaıdy mysal retinde keltirdi: «Qaǵazynda bul sary maı dep kórsetiledi, al is júzinde spred bolyp tabylady. Qaǵazynda spredtiń quramynda ol spred ekeni kórsetiledi, onda is júzinde 15-30% maı nemese tipti 0% bolady. Bul jerde taýarlardyń sapasy men qaýipsizdigin baqylaý komıtetiniń belsendi kómegi qajet».
Parlamenttiń joǵarǵy palatasynyń basshysy Darıǵa Nazarbaeva kezdesýlerdiń qorytyndysy boıynsha Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine aýyl sharýashylyǵy taýaryn óndirýshiler ókilderi qozǵaǵan problemalyq máselelerdi zerdeleýdi jáne olardy 2020 jyly bolatyn parlamenttik tyńdaýlarda talqylaýǵa daıyndaýdy tapsyrdy.