Qasym-Jomart Toqaev Ulttyq qoǵamdyq keńestiń ekinshi otyrysynda jerdi tıimdi paıdalaný máselesin sóz etti.
«Kókeıkesti máseleniń biri – jer jáne ony tıimdi paıdalanýǵa qatysty. Jaqynda Aqmola oblysyna jasaǵan saparymda aýyl sharýashylyǵy maqsatyndaǵy jerdi tıimsiz paıdalaný jaıyn baıqadym. Bul baǵytta meniń ustanymym bekem. Jerdi ıgere alatyn adam ǵana onyń ıesi bolýǵa laıyq», dedi Prezıdent.
Memleket basshysynyń aıtýynsha, jerdiń tıimsiz paıdalanyp jatqanyn anyqtaý óte qıyn. Sondyqtan zamanaýı tehnologııalar arqyly baqylaý engiziletin bolady.
«Aýyl sharýashylyǵyn tıimdi paıdalaný máselesin zamanaýı tehnologııalar arqyly baqylaýdy engizý kerektigi kórinip tur. Ulttyq komıssııa músheleri paıdalanylmaı jatqan jáne tıimsiz paıdalanylyp jatqan jerdi baqylaý úshin ǵaryshtyq monıtorıngke kóshýdiń qajettigin atap ótti. Qazan aıynda men jerdi qashyqtyqtan baqylaý úshin agroónerkásiptik keshendi retteý máseleleri jóninde zańǵa qol qoıdym. Birinshi qadam naqty zańnamalyq negiz boldy. Endi ǵaryshtyq sýretter arqyly jer ıesimen shartty buzý múmkin bolady», dedi Q.Toqaev.
Sondaı-aq Prezıdent jerdi sot arqyly alyp qoıýdyń tıimdi jáne jedel tetikterin qarastyrý mańyzdylyǵyn aıtty.
«Igerilmeı jatqan jer telimin qaıtaryp alý kezinde isti sozbalańǵa salýdyń túrli amal-aılasy, ókinishke qaraı, oryn alatyny boldy. Osyndaı jaǵdaıda jerdi eshkim paıdalana almaı, bos qalady», dedi Q.Toqaev.